ଝାରସୁଗୁଡ଼ା: ସୁନ୍ଦରଗଡ଼-ଝାରସୁଗୁଡ଼ା ଜିଲ୍ଲା ସୀମା ତାଲପଟିଆ ନିକଟରେ ଥିବା ବାଲିଘାଟଗୁଡ଼ିକରୁ ଚାଲିଛି ବାଲି ଚୋରାଚାଲାଣ । ପଡୋଶୀ ଜିଲ୍ଲା ସୁନ୍ଦରଗଡ଼ର ବାଲିମାଫିଆ ଓ ଠିକାଦାରମାନେ ଝାରସୁଗୁଡ଼ା ସୀମାରେ ଥିବା ଟାଙ୍ଗରପାଲି ମୌଜାର ଯେଉଁ ସବୁ ବାଲିଘାଟ ରହିଛି ସେଠାରୁ ଖୁଲମଖୁଲା ବାଲି ଚୋରା ଚାଲାଣ କରୁଥିବା ଅଭିଯୋଗ ହୋଇଛି ।
ଏହି ଚୋରା ବାଲି ଚାଲାଣ ପାଇଁ ୫ କୋଟିରୁ ଅଧିକ ଟଙ୍କାର ରାଜସ୍ବ ହାନି ହେଉଥିବା ବେସରକାରୀ ଭାବେ ଆକଳନ କରାଯାଇଛି । ମେସିନ ଯୋଗେ ନଦୀର ଗଭୀରତାରୁ ଅଧିକ ଖନନ କରୁଥିବା ଯୋଗୁଁ ମାଇନିଂ ପ୍ଲାନ ତଥା ପରିବେଶ ସନ୍ତୁଳନ ଏବଂ ସୁରକ୍ଷାର ନୀତି ନିୟମର ଉଲଙ୍ଘନ କରାଯାଉଥିବା ଦେଖିବାକୁ ମିଳିଛି । ଏନେଇ ଝାରସୁଗୁଡା ଉପଜିଲ୍ଲାପାଳଙ୍କୁ ପଚାରିବାରୁ ସେ କହିଛନ୍ତି, ଯଦି ଏଭଳି କାର୍ଯ୍ୟ ଚାଲିଥିବ ତେବେ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ସେହିଭଳି ରାଜସ୍ବ ବିଭାଗର ଅତିରିକ୍ତ ଜିଲ୍ଲାପାଳ କହିଛନ୍ତି, ଏ ବାବଦରେ ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଛି, ସେହି ବାଲିମାଫିଆଙ୍କ ବିରୁଦ୍ଧରେ ଏତଲା ଦାୟର କରିବା ପାଇଁ ଏବଂ ମେସିନ ଗାଡ଼ିଗୁଡ଼ିକୁ ଜବତ କରାଯାଇଛି । ସେପଟେ ଏବାବଦରେ ତହସିଲଦାର କ୍ୟାମେରା ଆଗରେ ମୁହଁ ଖୋଲିବା ପାଇଁ ମନା କରିଦେଇଛନ୍ତି ।
ଇଟିଭି ଭାରତ, ଝାରସୁଗୁଡ଼ା
