ଝାରସୁଗୁଡା: କାଉ କଥା କହିଲେ କଳା ରଙ୍ଗ ମନକୁ ଆସୁଥିବା ବେଳେ ଝାରସୁଗୁଡା ସହରରେ ଦେଖିବାକୁ ମିଳିଛି ଏକ ବିରଳ ଧଳା ରଙ୍ଗର କାଉ । ସହର ମଧ୍ୟରେ ଥିବା ମୁଙ୍ଗାପଡାରେ ରହୁଥିବା ଦିପ୍ତେସ ସୋନିଙ୍କ ଘର ବାହାରେ ବିଦ୍ୟୁତ ତାରରେ, ଖୁଣ୍ଟରେ ଓ ଘର ଲୁହାଗେଟ ଆଦି ବିଭିନ୍ନ ସ୍ଥାନରେ ଏହି କାଉଟି ବସି ରବୁଥିବା ଦେଖାଯାଇଥିଲା । ଅନ୍ୟ କଳା କାଉମାନେ ଏହି ବିରଳ ଧଳା କାଉଟିକୁ ହଇରାଣ କରୁଥିବା ଦେଖି ତୁରନ୍ତ ଉଦ୍ଧାର କରିଥିଲେ ଦିପ୍ତେସ ।
ଝାରସୁଗୁଡାରୁ ବିରଳ ଧଳା କାଉ ଉଦ୍ଧାର, ବନ ବିଭାଗକୁ ହସ୍ତାନ୍ତର
ଧଳା କାଉଟିକୁ ଉଦ୍ଧାର କରି ଘରେ ଏହାକୁ ଖାଦ୍ୟ ଦେବା ସହ ଯଥେଷ୍ଟ ଯତ୍ନ ନେଇଥିଲେ ଦିପ୍ତେସ । ଉଦ୍ଧାର କରିବା ପରେ କାଉଟି ଠିକ୍ ଭାବେ ଉଡିପାରୁ ନଥିବା ହୃଦବୋଧ କରିଥିଲେ ସେ । ତେବେ ଏହାର ଯତ୍ନ କରିବା ପରେ କାଉଟି ସୁସ୍ଥ ହୋଇଥିଲା । ଏହାପରେ ସେ କାଉଟିକୁ ବନ ବିଭାଗକୁ ହସ୍ତାନ୍ତର କରିଥିବା ସୂଚନା ଦେଇଛନ୍ତି ଝାରସୁଗୁଡା ଫରେଷ୍ଟର ରମେଶ ନାଥ ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
