ଝାରସୁଗୁଡା : ଅବୁଝା ମଙ୍ଗଳ ସାହୁଙ୍କୁ ବୁଝାଇବାରେ ସଫଳ ହୋଇଛି ବିଜେପି । ବ୍ରଜରାଜନଗର ଉପ ନିର୍ବାଚନରେ ଟିକେଟ୍ ବଣ୍ଟନରେ ଅସନ୍ତୋଷ ବ୍ୟକ୍ତ କରି ଦଳରୁ ମୁହଁ ଫେରାଇଥିଲେ ଝାରସୁଗୁଡା ବିଜେପି ଜିଲ୍ଲା ସଭାପତି ମଙ୍ଗଳ ସାହୁ । ଶେଷରେ ସେ ପୁଣି ଥରେ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି ।
ବରିଷ୍ଠ ନେତା କୁଚିଣ୍ଡା ପୂର୍ବତନ ବିଧାୟକ ତଥା ବିଜେପି ରାଜ୍ୟ ସାଧାରଣ ସମ୍ପାଦକ ରବି ନାଏକ ମଙ୍ଗଳଙ୍କୁ ବୁଝାସୁଝା କରିଥିଲେ । ପରେ ମଙ୍ଗଳବାର ସେ ତାଙ୍କର ଇସ୍ତଫାପତ୍ର ପ୍ରତ୍ୟାହାର କରିଥିବା ନେଇଥିବା ସୂଚନା ମିଳିଛି । ସୂଚନା ଅନୁସାରେ, ରବିବାର ବିଜେପି ପକ୍ଷରୁ ବ୍ରଜରାଜନଗର ଉପନିର୍ବାଚନ ଦଳୀୟ ପ୍ରାର୍ଥୀ ଭାବେ ରାଧାରାଣୀ ପଣ୍ଡା ନାମ ଘୋଷଣା କରିଥିଲା ।
ଏହା ପରେ ଖପ୍ପା ହୋଇଥିଲେ ବିଜେପି ଜିଲ୍ଳା ସଭାପତି । ବ୍ରଜରାଜନଗର ଉପନିର୍ବାଚନ ପାଇଁ ଆଶାୟୀ ପ୍ରାର୍ଥୀ ଥିଲେ ମଙ୍ଗଳ ସାହୁ । ଅସନ୍ତୋଷ ପ୍ରକାଶ କରି ନିଜ ଇସ୍ତଫା ପତ୍ର ରାଜ୍ୟ ସଭାପତି ସମୀର ମହାନ୍ତିଙ୍କୁ ଦେଇଥିଲେ । ତେବେ ଆଜି ବିଧାୟିକା ପ୍ରାର୍ଥୀ ରାଧାରାଣୀ ପଣ୍ଡା ନାମାଙ୍କନ ପତ୍ର ଦାଖଲ କରିବେ । ଏହି ସମୟରେ ରାଜ୍ୟ ସଭାପତି ସମୀର ମହାନ୍ତି ଉପସ୍ଥିତ ରହିବେ ବୋଲି ସୂଚନା ମିଳିଛି । ଏହାସହ କଂଗ୍ରେସ ଓ ବିଜେଡି ପ୍ରାର୍ଥୀ ମଧ୍ୟ ନିଜ ନାମାଙ୍କନ ଦାଖଲ କରିବେ ବୋଲି ସୂଚନା ମିଳିଛି ।
ଝାରସୁଗୁଡାରୁ ଗୁରୁ ଚରଣ ବାଘ,ଇଟିଭି ଭାରତ
