ଝାରସୁଗୁଡା: ଆବାସ ଯୋଜନାରେ ଦୁର୍ନୀତି ଅଭିଯୋଗ । ମନରେଗା(ଏମଜିଏନଆରଇଜିଏ)ରୁ ଆସିଥିବା ଲକ୍ଷାଧିକ ଟଙ୍କାକୁ ବିଭାଗୀୟ କର୍ମୀ ଚଳୁ କରିଥିବାର ଅଭିଯୋଗ ହୋଇଛି । ଝାରସୁଗୁଡା ଲଖନପୁର ବ୍ଲକ ପଞ୍ଚାୟତର କନିଷ୍ଠ ଯନ୍ତ୍ରୀ ପ୍ରକାଶ ସାହୁ ଓ ପଞ୍ଚଗାଁ ପଞ୍ଚାୟତର ଜିଆରଏସ ପ୍ରଭାତ ସାଙ୍କ ମଧ୍ୟରେ ଦୁର୍ନୀତି ହୋଇଥିବା ନେଇ ଏକ ଭିଡିଓ ଭାଇରାଲ ହୋଇଥିଲା । ଯାହାକୁ ନେଇ ଏବେ ସାରା ରାଜ୍ୟରେ ଚର୍ଚ୍ଚାର ବିଷୟ ପାଲଟିଛି ।
ଯେଉଁଥିରେ ପଞ୍ଚଗାଁ ପଞ୍ଚାୟତକୁ ଗତ 6 ବର୍ଷ ମଧ୍ୟରେ ଆବାସ ଯୋଜନାରେ(ଇନ୍ଦିରା ଆବାସ, ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନା ଓ ବିଜୁ ପକ୍କା ଘର)ମନରେଗାରୁ ଆସିଥିବା ମୋଟ 22ଲକ୍ଷ 32 ହଜାର ଶ୍ରମିକମାନଙ୍କୁ ପାଉଣା ଦିଆଯାଇଥିଲା । ହେଲେ ବର୍ଷକୁ 6 ଲକ୍ଷ ରୁ 16 ଲକ୍ଷ ଟଙ୍କା ଶ୍ରମିକ ପାଉଣାରେ ଦୁର୍ନୀତି ହୋଇଥିବା ନେଇ ଏହି ଭିଡିଓରେ ଭାଇରାଲ ହୋଇଛି । ଏହାକୁ ନେଇ କନିଷ୍ଠ ଯନ୍ତ୍ରୀ ତାଙ୍କର ସ୍ପଷ୍ଟୀକରଣ ମଧ୍ୟ ଦେଇଛନ୍ତି ।
ଏ ସମ୍ପର୍କିତ ଭିଡିଓ ଭାଇରାଲ ହେବା ପରେ ଅଭିଯୋଗର ଶିକାର ହୋଇଥିବା ଜିଆରଏସ ପ୍ରଭାତ ସା ନିଜ ଆଡୁ ତଦନ୍ତ କରିବାଜୁ ବିଡିଓଙ୍କ ସମେତ ଜିଲ୍ଲା ପ୍ରଶାସନକୁ ଚିଠି ଲେଖି ଅନୁରୋଧ କରିଛନ୍ତି। ଏତେ ବଡ ଦୁର୍ନୀତି ସମ୍ପର୍କରେ କାହିଁକି ଉପରିସ୍ଥ ଅଧିକାରୀଙ୍କୁ ଜଣାଇ ନାହାଁନ୍ତି ଜେଇ ? ଯଦ୍ବାରା ରାଜ୍ୟ ସରକାର ସହିତ ପ୍ରଶାସନ ମଧ୍ୟ ବଦନାମ ହେଉଛି, ଏହା ଉପରେ ନିରପେକ୍ଷ ତଦନ୍ତ କରାଯାଉ ବୋଲି ସେ ଦାବି କରିଛନ୍ତି ।
ତେବେ ଏ ନେଇ ଝାରସୁଗୁଡା ଜିଲ୍ଲାପାଳ ସରୋଜ କୁମାର ସାମଲ କହିଛନ୍ତି ଯେଉଁ ଅଧିକାରୀଙ୍କ ପାଇଁ ସରକାର ଉପରେ ଦାଗ ଲାଗୁଛି ତାଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ସହିତ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯିବ । ଅନ୍ୟପଟେ ଭିଡିଓ ଭାଇରାଲ ପରେ ଝାରସୁଗୁଡା ଜିଲ୍ଳାପାଳଙ୍କ ନିର୍ଦ୍ଦେଶ କ୍ରମେ ପିଡି ଡିଆରଡିଓ ତପିରାମ ମାଝୀଙ୍କ ନେତୃତ୍ବରେ ତିନି ଜଣିଆ କମିଟି ଘଟଣାର ସତ୍ୟାସତ୍ୟ ଉପରେ ତଦନ୍ତ ଆରମ୍ଭ କରିଛନ୍ତି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
