ଝାରସୁଗୁଡ଼ା: ଅଚେତ୍ ଶ୍ରମିକଙ୍କୁ ମୃତ ମନେ କରି ଜଙ୍ଗଲ ଭିତରେ ଫୋପାଡ଼ି ଦିଆଯାଇଛି। ଝାରସୁଗୁଡ଼ା ସୀମାବର୍ତ୍ତୀ ଅଞ୍ଚଳରେ ଘଟିଯାଇଛି ଏଭଳି ଏକ ହୃଦୟ ବିଦାରକ ଘଟଣା । ଲଖନପୁର ବ୍ଲକ ଅନ୍ତର୍ଗତ ରେଙ୍ଗାଲି ଥାନା ବାଦିମାଲ ସ୍ଥିତ ସଂଖୋଲିଆ ରାଇସ ମିଲରେ ଘଟିଥିଲା ବୈଦ୍ୟୁତିକ ଅଗ୍ନିକାଣ୍ଡ । ଅଗ୍ନିକାଣ୍ଡ କାରଣରୁ ଜଣେ କାର୍ଯ୍ୟରତ ଶ୍ରମିକ ଅର୍ଦ୍ଧଦଗ୍ଧ ଅବସ୍ଥାରେ ଅଚେତ୍ ହୋଇ ଯାଇଥିଲେ । ବିଡମ୍ବନାର ବିଷୟ ହେଉଛି, ରାଇସ ମିଲରେ ଅଗ୍ନିକାଣ୍ଡ ପରେ ବାହାର ରାଜ୍ୟର ଶ୍ରମିକକୁ ଅର୍ଦ୍ଧଦଗ୍ଧ ଅବସ୍ଥାରେ ଫିଙ୍ଗି ଦେଇଛନ୍ତି ମିଲ କର୍ମଚାରୀ । ତେବେ ଆହତ ଶ୍ରମିକ ନତିମ ଅହମ୍ମଦଙ୍କୁ ଉଦ୍ଧାର କରି ଝାରସୁଗୁଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ସୂଚନା ମିଳିଛି । ସେଠାରେ ତାଙ୍କର ଚିକିତ୍ସା ଜାରି ରହିଛି।
କଥାରେ ଅଛି, "ରଖେ ହରି ତ ମାରେ କିଏ "। ଆଉ ଏହି ଉକ୍ତିଟି ସତ୍ୟ ପ୍ରମାଣିତ ହୋଇଛି । ରେଙ୍ଗାଲି ଥାନା ଅନ୍ତର୍ଗତ ବାଦିମାଲ ସ୍ଥିତ ସଂଖୋଲିଆ ରାଇସ ମିଲରେ ଶ୍ରମିକ କାମ କରୁଥିଲେ । ରବିବାର ଶ୍ରମିକ ଜଣକ ମିଲରେ କାମ କରୁଥିବା ସମୟରେ ହଠାତ୍ ନିଆଁ ଲାଗି ଯିବାରୁ ସେ ଜଳି ଯାଇ ବେହୋସ ହୋଇଯାଇଥିଲେ । ଶ୍ରମିକ ଜଣକ ମୃତ ବୋଲି ଭାବି ତାଙ୍କୁ ମିଲ ପାଖରେ ଥିବା ଜଙ୍ଗଲରେ ଫୋପାଡ଼ି ଦିଆଯାଇଥିବା ସେ ଅଭିଯୋଗ କରିଛନ୍ତି । ସ୍ଥାନୀୟ ଲୋକେ ଶ୍ରମିକକୁ ଉଦ୍ଧାର କରି ପୋଲିସକୁ ଖବର ଦେଇଥିଲେ । ପୋଲିସ ଶ୍ରମିକଙ୍କୁ ଝାରସୁଗୁଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ଚିକିତ୍ସା ପାଇଁ ପଠାଇ ଥିବାବେଳେ ସେଠାରେ ତାଙ୍କର ଚିକିତ୍ସା ଜାରି ରହିଛି । ତାଙ୍କୁ କମ୍ପାନୀ ପକ୍ଷରୁ ଠିକ ଭାବେ ଦରମା ପ୍ରଦାନ କରାଯାଉନଥିବା ଅଭିଯୋଗ କରିଛନ୍ତି ଆହତ ଶ୍ରମିକ ।
ଏହା ବି ପଢନ୍ତୁ...ବିଡିପିଏଲ ସଂସ୍ଥାରେ ଶ୍ରମିକ ଅଶାନ୍ତି
ତେବେ ଆହତ ଶ୍ରମିକ ନତିମ ଅହମ୍ମଦ କହିଛନ୍ତି, "କମ୍ପାନୀ କର୍ତ୍ତୃପକ୍ଷ ପ୍ରାପ୍ୟ ଦେଉନାହାନ୍ତି । ଏହି ଅଘଟଣ ଘଟିବା ପରେ ତାଙ୍କୁ ଜଙ୍ଗଲ ମଧ୍ୟରେ ଫୋପାଡ଼ି ଦିଆଯାଇଥିଲା । ଏନେଇ ପୋଲିସ ପାଖରେ କୌଣସି ଏଫଆଇଆର ଦାୟର ହୋଇନଥିବାବେଳେ ପୋଲିସ ଏହି ଘଟଣାର ପ୍ରାଥମିକ ତଦନ୍ତ ଆରମ୍ଭ କରିଦେଇଛି । ଏନେଇ ଅତିରିକ୍ତ ଆରକ୍ଷୀ ଅଧିକ୍ଷକ ଏନ ସି ବାରିକ କହିଛନ୍ତି, "ପରବର୍ତ୍ତୀ ସମୟରେ ଏତଲା ଦିଆଗଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ "। କମ୍ପାନୀ କର୍ତ୍ତୃପକ୍ଷଙ୍କ ଏଭଳି ଅମାନବୀୟ କାଣ୍ଡକୁ ସବୁ ମହଲରେ ନିନ୍ଦା କରାଯାଇଛି।
ଇଟିଭି ଭାରତ, ଝାରସୁଗୁଡ଼ା
