ଝାରସୁଗୁଡା: ବର୍ତ୍ତମାନ ଡିଜିଟାଲ ଯୁଗରେ ଆଖି ପ୍ରତି ବଢୁଛି ଅବହେଳା । ହେଲେ ଝାରସୁଗୁଡାର ସିଦ୍ଧାର୍ଥ କିନ୍ତୁ ଏହାର ବ୍ୟତିକ୍ରମ । ନିଜ କୁନି ପୁଅର ଅସୁବିଧାକୁ ବୁଝି ଜିଲ୍ଲାର ସମସ୍ତ ଛାତ୍ରଛାତ୍ରୀଙ୍କ ଚକ୍ଷୁ ସୁରକ୍ଷା ପାଇଁ ଭିଡିଛନ୍ତି ଅଣ୍ଟା । କୋଭିଡ-୧୯ ର ପ୍ରକୋପ ଯୋଗୁଁ ଦେଶରେ ଛାତ୍ରଛାତ୍ରୀଙ୍କର ପାଠପଢ଼ା ପ୍ରଭାବିତ ହୋଇଥିଲା । ଯାହା ଫଳରେ ସରକାର ନିଷ୍ପତ୍ତି ନେଇଥିଲେ ଅନଲାଇନ କ୍ଲାସ କରି ଛାତ୍ରଛାତ୍ରୀଙ୍କୁ ଶିକ୍ଷା ସହିତ ଯୋଡ଼ି ରଖିବେ । ହେଲେ ଏହା ଏକ ସ୍ବାସ୍ଥ୍ୟଗତ ସମସ୍ୟାରେ ପରିଣତ ହୋଇଥିବା ନଜର ଆସିଛି । ବର୍ତ୍ତମାନ ମୋବାଇଲ ଫୋନର ରେଡିଏସନ୍ ଯୋଗୁଁ ହେଉଛି ପିଲାଙ୍କ ଆଖି ପ୍ରଭାବିତ ।
ଝାରସୁଗୁଡ଼ା ସହର ସ୍ଥିତ ଡିପିଏସ୍ ସ୍କୁଲର ଜଣେ କୁନିଛାତ୍ରଙ୍କ ଆଖି ଏହି କାରଣରୁ ପ୍ରଭାବିତ ହେବାରୁ ତାଙ୍କ ପିତା ବେଶ ଚିନ୍ତିତ ରହୁଥିଲେ । ତେବେ ନିଷ୍ପତ୍ତି ନେଲେ ଏହି ସମସ୍ୟା କିଭଳି ଦୂର କରାଯିବ । ଏହି ସମସ୍ୟାକୁ ଦୁର କରିବା ପାଇଁ ଝାରସୁଗୁଡ଼ା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ଡାକ୍ତର ରାକେଶ ଚନ୍ଦ୍ର ରାଉତଙ୍କ ସାହାଯ୍ୟ ନେଇଥିଲେ ଏନେଇ ଖୋଲିଥିଲେ ଏକ ଆଇ-କ୍ଲିନିକ ।
କେବଳ ସେତିକି ନୁହେଁ । ବର୍ତ୍ତମାନ ଜିଲ୍ଲାର ସମସ୍ତ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ ଗୁଡ଼ିକର ଛାତ୍ରଛାତ୍ରୀଙ୍କ ମାଗଣାରେ ଚିକିତ୍ସା କରିବା ପାଇଁ କ୍ୟାମ୍ପ ମାନ କରୁଥିବା ଦେଖିବାକୁ ମିଳିଛି । ତେବେ ଚକ୍ଷୁ ବିଶେଷଜ୍ଞ ଡାକ୍ତର ରାକେଶ ଚନ୍ଦ୍ର ରାଉତ ଏହି ମାଗଣା ଚକ୍ଷୁ ସେବା ଶିବିର ରେ କୁନି ପିଲାଙ୍କ ଚିକିତ୍ସା କରିବା ଏକ ମହତ କାର୍ଯ୍ୟ ବୋଲି କହିଛନ୍ତି । ସେହିପରି ସିଦ୍ଧାର୍ଥ ସହରର ସମସ୍ତ ବିଦ୍ୟାଳୟରେ ମାଗଣା ଚକ୍ଷୁ ଚିକିତ୍ସା ପାଇଁ ପ୍ରୟାସ କରୁଥିବା ବେଳେ ତାଙ୍କର ଏଭଳି ପଦକ୍ଷେପ ଯୋଗୁଁ ଅନେକ ଛାତ୍ରଛାତ୍ରୀ ଉପକୃତ ହୋଇଛନ୍ତି ।
ଇଟିଭି ଭାରତ, ଝାରସୁଗୁଡା
