ଝାରସୁଗୁଡ଼ା: ଜିଲ୍ଲାର ବକ୍ସି ଛକ ଲହଣ୍ଡାବୁଡ଼ ରାସ୍ତାର ମରାମତି କାର୍ଯ୍ୟ ଦୀର୍ଘ ବର୍ଷ ହେବ କରାଯାଇନାହିଁ । ଫଳରେ ବ୍ୟାପକ ଧୂଳି ଉଡିବା ସହ ବର୍ଷା ଦିନେ ପାଣି କାଦୁଅରେ ଯାତାୟତ କରିବା ଦୁର୍ବିସହ ହୋଇପଡିଛି । ଏନେଇ ଶନିବାର ସ୍ଥାନୀୟ ଲୋକେ ଅନିର୍ଦ୍ଦିଷ୍ଟ କାଳ ପାଇଁ ରାସ୍ତା ଅବରୋଧ କରିଛନ୍ତି ।
ଏ ରାସ୍ତାର ଅବସ୍ଥା ଏତେ ମାତ୍ରାରେ ଖରାପ ହୋଇଛି ଯେ, ଭାରିଯାନ ଚଳାଚଳ ତ ଦୂରର କଥା ପାଦରେ ଚାଲି ଯିବା ମଧ୍ୟ କଷ୍ଟକର ହୋଇପଡିଛି । ଏହାସହ ଉକ୍ତ ରାସ୍ତା ଦେଇ ବାଲି ଓ ପାଉଁଶ ନେଇ ଭାରିଯାନ ଯାଉଥିବାରୁ ରାସ୍ତାରେ ଅଧିକାଂଶ ସମୟରେ ଦୁର୍ଘଟଣା ସଂଖ୍ୟା ବଢିବାରେ ଲାଗିଛି।
ଏନେଇ ଝାରସୁଗୁଡ଼ା ଜିଲ୍ଲାପାଳଙ୍କୁ ଚଳିତ ମାସ 22 ତାରିଖରେ ସ୍ଥାନୀୟ ଲୋକେ ରାସ୍ତା ମରାମତି ପାଇଁ ଦାବି କରିଥିଲେ। ହେଲେ ଅନେକ ଦିନ ବିତିଯାଇଥିଲେ ମଧ୍ୟ ରାସ୍ତାର କୌଣସି ମରାମତି କିମ୍ବା ଭରିଯାନ ଚଳାଚଳ ରୋକିବା ଦିଗରେ କୌଣସି ପଦକ୍ଷେପ ନିଆଯାଇନାହିଁ । ଯାହାକୁ ନେଇ ଶନିବାର ସ୍ଥାନୀୟ ଲୋକେ ବକ୍ସି ଛକଠାରେ ଅନିର୍ଦ୍ଦିଷ୍ଟ କାଳ ପାଇଁ ରାସ୍ତା ଅବରୋଧ କରିଛନ୍ତି । ଏହାସହ ଅତିଶୀଘ୍ର ମରାମତି କାର୍ଯ୍ୟ ଆରମ୍ଭ ନହେଲେ ଆଗକୁ ଏହା ଆନ୍ଦୋଳନର ରୂପ ନେବ ବୋଲି ଚେତାବନୀ ଦିଆଯାଇଛି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
