ଝାରସୁଗୁଡା: କିଛିଦିନର ନିରବତା ପରେ ପୁଣିଥରେ ଜିଲ୍ଲାଗସ୍ତ ଆରମ୍ଭ କରିଛନ୍ତି ‘5T’ ସଚିବ ଭିକେ ପାଣ୍ଡିଆନ । ଆଜି (ମଙ୍ଗଳବାର) ସ୍ବାସ୍ଥ୍ୟ ମନ୍ତ୍ରୀ ନବ କିଶୋର ଦାସଙ୍କ ଜିଲ୍ଲାରେ କେମିତି ଚାଲିଛି ଜିଲ୍ଲା ଚିକିତ୍ସାଳୟର ସ୍ବାସ୍ଥ୍ୟସେବା, ତାକୁ ପରଖିବା ପାଇଁ ‘5T’ ସଚିବ ଓ ତାଙ୍କ ଟିମ ଅଚାନକ ଗସ୍ତ କରିଛନ୍ତି ।
କାରଣ ନବୀନ ପଟ୍ଟନାୟକ ପଞ୍ଚମ ଥର ପାଇଁ କ୍ଷମତାକୁ ଫେରିବା ପରେ ରାଜ୍ୟରେ ବିପର୍ଯ୍ୟସ୍ତ ହୋଇ ପଡିଥିବା ସ୍ବାସ୍ଥ୍ୟସେବାକୁ ସଜାଡିବା ପାଇଁ ଉଦ୍ୟମ ଆରମ୍ଭ କରିଥିଲେ । ଏଥିପାଇଁ ନିଜ ବ୍ୟକ୍ତିଗତ ସଚିବଙ୍କୁ ପ୍ରଶାସନ ବ୍ୟବସ୍ଥାକୁ ଆଣି ତାଙ୍କୁ ‘5T’ ସଚିବ ଭାବେ ନିଯୁକ୍ତ କରିଥିଲେ । ‘5T’ ବ୍ୟବସ୍ଥା ମାଧ୍ୟମରେ ରାଜ୍ୟ ସରକାର ସ୍ବାସ୍ଥ୍ୟଲସେବାରେ ପରିବର୍ତ୍ତନ ପାଇଁ ଉଦ୍ୟମ କରିଛନ୍ତି । ଯେଉଁଥିପାଇଁ ଟିମ ‘5T’ ଓ ତାଙ୍କ ଟିମ ବିଭିନ୍ନ ଜିଲ୍ଲା ମୁଖ୍ୟ ଚିକିତ୍ସାଳୟ ବୁଲିବା ସହ ସିଧା ସଳଖ ରୋଗୀ ଓ ସମ୍ପର୍କୀୟଙ୍କ ସହ ଆଲୋଚନା କରୁଥିଲେ । ପରେ ମୁଖ୍ୟମନ୍ତ୍ରୀଙ୍କୁ ରିପୋର୍ଟ ପ୍ରଦାନ କରୁଥିଲେ । ମୁଖ୍ୟମନ୍ତ୍ରୀ ତୁରନ୍ତ ସେହି ଜିଲ୍ଲା ପାଇଁ ପ୍ୟାକେଜ ଘୋଷଣା କରୁଥିଲେ ।
ତେବେ ‘5T’ ସଚିବ ଓ ତାଙ୍କ ଟିମ ସ୍ବାସ୍ଥ୍ୟମନ୍ତ୍ରୀଙ୍କ ଜିଲ୍ଲା ଝାରସୁଗୁଡା ଗସ୍ତ କରିନଥିଲେ । ଯାହାକୁ ନେଇ ‘ଇଟିଭି ଭାରତ’ ରେ ଖବର ପ୍ରକାଶ ପାଇବା ସହ ସ୍ଥାନୀୟ ଅଞ୍ଚଳରେ ବିଭିନ୍ନ ପ୍ରତିକ୍ରିୟା ପ୍ରକାଶ ପାଇଲା । ତେବେ ମଙ୍ଗଳବାର ‘5T’ ସଚିବ ଓ ତାଙ୍କ ଟିମ ଝାରସୁଗୁ଼ଡା ଗସ୍ତରେ ଆସି ଜିଲ୍ଲା ମୁଖ୍ୟ ଚିକିତ୍ସାଳୟ ପରିଦର୍ଶନ କରିବା ସହ ରୋଗୀ ଓ ତାଙ୍କ ସଂପର୍କୀୟଙ୍କ ସହ ଆଲୋଚନା କରିଛନ୍ତି ।
‘5T’ ସଚିବ ଓ ତାଙ୍କ ଟିମ ଜିଲ୍ଲା ମୁଖ୍ୟ ଚିକିତ୍ସାଳୟ ଗସ୍ତ ଅବସରରେ ସିଡିଏମଓ, ଜିଲ୍ଲାପାଳ ଓ ଡାକ୍ତରଙ୍କ ସହ ଆଲୋଚନା କରିଥିଲେ । ଜିଲ୍ଲା ମୁଖ୍ୟ ହସ୍ପିଟାଲ ହୋଇଥିବାରୁ ସମସ୍ୟା, ଅଭାବ ଅସୁବିଧା ସମ୍ପର୍କରେ ବୁଝିଥିଲେ। ଏହାସହ ‘5T’ ଟିମ ରୋଗୀଙ୍କ ସହ ମଧ୍ୟ ଆଲୋଚନା କରି ବିଭିନ୍ନ ସମସ୍ୟା ସଂପର୍କରେ ଜାଣିବାକୁ ଚାହିଁଥିଲେ । ଏହି ଟିମରେ ‘5T’ ସଚିବ, ଭିକେ ପାଣ୍ଡିଆନ, ଉନ୍ନୟନ କମିଶନର ସୁରେଶ ମହାପାତ୍ର, ସ୍ବାସ୍ଥ୍ୟ ବିଭାଗ ଯୁଗ୍ମ ସଚିବ ତାପସ ପୁନମ ଗୁହା ପ୍ରମୁଖ ସାମିଲ ଥିଲେ । ତେବେ ଟିମକୁ ସ୍ଥାନୀୟ ତଥା ଝାରସୁଗୁଡା ଜିଲ୍ଲାର ଏକ ବୁଦ୍ଧିଜୀବୀ ପ୍ରିତିନିଧି ସାକ୍ଷାତ କରିବା ପାଇଁ ଚାହିଁଥିଲେ ମଧ୍ୟ ସାକ୍ଷାତ କରିପାରିନଥିଲେ । ‘5T’ ଟିମଙ୍କ ଗସ୍ତକୁ ନେଇ ଜିଲ୍ଲାବାସୀ ଖୁସି ପ୍ରକଟ କରିଛନ୍ତି । କିନ୍ତୁ ସ୍ବାସ୍ଥ୍ୟମନ୍ତ୍ରୀଙ୍କ ଜିଲ୍ଲା ହୋଇଥିବାରୁ ନିଜେ ସ୍ବାସ୍ଥ୍ୟମନ୍ତ୍ରୀ ଅନୁପସ୍ଥିତକୁ ନେଇ ବିଭିନ୍ନ ଚର୍ଚ୍ଚା ଲାଗିଛି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
