ଯାଜପୁର: କେନ୍ଦ୍ର ଓ ରାଜ୍ୟ ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛି କଳିଙ୍ଗନଗରର ଏକମାତ୍ର ରାଷ୍ଟ୍ରାୟତ ଉଦ୍ୟୋଗ ନୀଳାଚଳ କାରଖାନା। ଏହାକୁ ଘରୋଇକରଣ ପାଇଁ ସରକାରୀ ସ୍ତରରେ ପ୍ରକ୍ରିୟା ଆରମ୍ଭ ହୋଇଥିବାବେଳେ, ତଥାପି ଅବହେଳିତ ଅବସ୍ଥାରେ ରହିଛି କାରଖାନା। ଯାହାକୁ ପୁନଃର୍ବାର କାର୍ଯ୍ୟକ୍ଷମ କରିବା ଦିଗରେ ସରକାର ପଦକ୍ଷେପ ନେବାକୁ ଦାବି ହୋଇଛି।
ନୀଳାଚଳ କାରଖାନାରୁ ପୁଞ୍ଜି ପ୍ରତ୍ୟାହାର ଓ ଘରୋଇକରଣ ଚକ୍ରାନ୍ତକୁ ବିରୋଧ କରିଛନ୍ତି ଶ୍ରମିକ ସଙ୍ଗଠନ । ଏନେଇ ନୀଳାଚଳ ବଞ୍ଚାଅ ମିଳିତ ମଞ୍ଚ ପକ୍ଷୁରୁ ଦାନଗଦୀ ଭବନ ଠାରେ ବିଶାଳ କର୍ମଚାରୀ ବୈଠକ ଅନୁଷ୍ଠିତ ହୋଇଯାଇଛି । ଏଥିରେ ନୀଳାଚଳ କାରଖାନାକୁ ଚାଲୁ ରଖିବା ସହ ମାସିକ ଦରମା, ଭତ୍ତା ପ୍ରଦାନ ଏବଂ ଘରୋଇକରଣ ଷଡଯନ୍ତ୍ରରୁ ମୁକ୍ତି ଦେବାକୁ ଦାବି ହୋଇଛି। ପ୍ରାୟ ୫ରୁ ଊର୍ଦ୍ଧ୍ବ କେନ୍ଦ୍ରୀୟ ଟ୍ରେଡ ୟୁନିୟନର ରାଜ୍ୟସ୍ତରୀୟ ନେତୃମଣ୍ଡଳୀ, ବିଭିନ୍ନ ଶ୍ରମିକ ସଙ୍ଗଠନ, ଜମିହରା ବାସଚ୍ୟୁତ, ସ୍ଥାୟୀ ଓ ଅସ୍ଥାୟୀ କର୍ମଚାରୀ ଏଥିରେ ଯୋଗଦେଇ ତୁରନ୍ତ ମୁଖ୍ୟମନ୍ତ୍ରୀଙ୍କୁ ଏହାକୁ ଘରୋଇକରଣ କରିବା ପ୍ରକ୍ରିୟାକୁ ବିରୋଧ କରିବା ସହ ଏଥିରେ ପୁନଃ ଅର୍ଥ ବିନିଯୋଗ କରି ଏହାକୁ କାର୍ଯ୍ୟକ୍ଷମ କରିବା ଦିଗରେ ପଦକ୍ଷେପ ନେବାକୁ ଦାବି କରିଛନ୍ତି । ଯଦି ସରକାର ଦାବି ନ ଶୁଣନ୍ତି ତେବେ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବା ସହ ବିଧାନସଭା ଘେରାଉ କରିବାକୁ ଚେତାବନୀ ଦିଆଯାଇଛି।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
