ଯାଜପୁର: ଛୋଟ ପିଲାଙ୍କ ବଡ କାମକୁ ନେଇ ଚାରିଆଡେ ଚର୍ଚ୍ଚା । ଚର୍ଚ୍ଚା ଏପରି ହେଲା ଯେ ମୁଖ୍ୟମନ୍ତ୍ରୀ ସେମାନଙ୍କୁ ନିମନ୍ତ୍ରଣ କରି ସମ୍ବର୍ଦ୍ଧିତ କରି ସାବାସି ଦେଲେ । ଆଉ ଏ କଥା ହେଉଛି ଜିଲ୍ଲାର କୋରେଇ ବ୍ଲକ ସାଦକପୁର ଗାଁର ଅଷ୍ଟମ ଶ୍ରେଣୀର ଛାତ୍ର ଶେଖ୍ ମହମ୍ମଦ ଶୋଏବ ଏବଂ ଶେଖ ତୋସିବଙ୍କର। ଉଭୟଙ୍କ ସାହସ ଓ ନିର୍ଭିକତା ପାଇଁ ଜଣେ ପ୍ରଥମ ଶ୍ରେଣୀର ଛାତ୍ରର ଜୀବନ ବଞ୍ଚିଗଲା। ଛାତ୍ର ଜଣକ ପୋଖରିରେ ବୁଡିଯାଉଥିବା ଦେଖି ପାଣିକୁ ଡେଇଁ ପଡିଥିଲେ ଶୋଏବ ଏବଂ ତୋସିବ ।
ନିଜ ଜୀବନକୁ ବାଜି ଲଗାଇ ପିଲାଟିକୁ ବଞ୍ଚାଇବା ପରେ ସାଙ୍ଗ ସାଥୀ ଠାରୁ ଆରମ୍ଭ କରି ସାହି ପଡିଶା ସେମାନଙ୍କ ସାହସିକତାକୁ ପ୍ରଶଂସାରେ ପୋତି ପକାଉଛନ୍ତି । ଅନ୍ୟ ଛାତ୍ର ମାନଙ୍କ ପାଇଁ ସେମାନେ ପାଲଟିଛନ୍ତି ଉଦାହରଣ । ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଭୟଙ୍କୁ ନିଜ କାର୍ଯ୍ୟାଳୟକୁ ଡାକି ସମ୍ବର୍ଦ୍ଧିତ କରିବା ସହିତ ସେମାନଙ୍କର ଉତ୍ତୋରତର ଉନ୍ନତି କାମନା କରିଛନ୍ତି । ନିଜ ସ୍କୁଲ ପାଖ ପୋଖରୀରେ ଜଣେ ପ୍ରଥମ ଶ୍ରେଣୀର ଛାତ୍ର ବୁଡିଯାଉଥିବା ଦେଖି ଉଭୟ ଡେଇଁପଡିଥିଲେ ପୋଖରି ମଧ୍ୟକୁ । ଆଉ ସୁରକ୍ଷିତ ଭାବେ ଉଦ୍ଧାର କରି ଚର୍ଚ୍ଚାକୁ ଆସିଥିଲେ ଉଭୟ ଶୋଏବ ଏବଂ ତୋସିବ ।
ଉଭୟଙ୍କ ସାହାସିକତା ସଂପର୍କରେ ବିଭିନ୍ନ ସାମାଜିକ ଗଣମାଧ୍ୟମରେ ପ୍ରଚାର ହେବା ପରେ ଜିଲ୍ଲା ପ୍ରଶାସନ ପକ୍ଷରୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ମଧ୍ୟ ଅବଗତ କରାଯାଇଥିଲା । ଚାରିଆଡୁ ଆସିଥିଲା ଶୁଭେଚ୍ଛାର ସୁଅ । ସାଦକପୁର ଭଳି ଅଖ୍ୟାତ ଗାଁ ଉଭୟଙ୍କ ସାହାସିକତା ପାଇଁ ପାଲଟି ଯାଇଛି ଆକର୍ଷଣର କେନ୍ଦ୍ରବିନ୍ଦୁ । ଉଭୟ ଛାତ୍ରଙ୍କୁ ସମ୍ବର୍ଦ୍ଧିତ କରିବା ପାଇଁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଡାକରା ଆସିଥିଲା । ସ୍ଥାନୀୟ ବିଧାୟକ ଅଶୋକ ବଳ ଏବଂ ଯାଜପୁର ସାଂସଦ ସର୍ମିଷ୍ଠା ସେଠୀଙ୍କ ଉପସ୍ଥିତିରେ ମୁଖ୍ୟମନ୍ତ୍ରୀ ଉଭୟଙ୍କୁ ବିଭିନ୍ନ ଉପହାର ଦେବା ସହିତ ପ୍ରଶଂସା ମଧ୍ୟ କରିଥିଲେ । ତେବେ ଏତେ କମ ବୟସରେ ଦୁଇ ପିଲାଙ୍କ କାର୍ଯ୍ୟ ପାଇଁ ଖାଲି କୋରେଇ ନୁହେଁ ସାରା ରାଜ୍ୟ ଆଜି ଗର୍ବିତ । ତେବେ ଏହି ପିଲା ଦୁହିଁଙ୍କୁ ଯଦି ପ୍ରଧାନମନ୍ତ୍ରୀ ସାହାସିକତା ପୁରସ୍କାର ମିଳନ୍ତା ସେ ଆହୁରି ଅନେକ ଛାତ୍ରଛାତ୍ରୀଙ୍କ ପାଇଁ ପ୍ରେରଣାର ବାର୍ତ୍ତା ହୁଅନ୍ତା ବୋଲି କୋରେଇ ହାଇସ୍କୁଲର ଶିକ୍ଷକ କହିଛନ୍ତି।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
