ଯାଜପୁର: କଳିଙ୍ଗନଗର ଶିଳ୍ପାଞ୍ଚଳରେ ପୁଣି ସୃଷ୍ଟି ହୋଇଛି ଅଶାନ୍ତ ବାତାବରଣ । ବିଭିନ୍ନ କାରଖାନା ଦ୍ବାରା ବିସ୍ଥାପିତ ହୋଇଥିବା ପରିବାର ମାନଙ୍କର ବିଭିନ୍ନ ସମସ୍ୟା ନେଇ ଆନ୍ଦୋଳନକୁ ଓହ୍ଲାଇଛନ୍ତି ତ୍ରିଜଙ୍ଗା କଲୋନୀର ବିସ୍ଥାପିତ ପରିବାର । ସ୍ଥାନୀୟ ମିଲିଟାରୀ ଛକ ଠାରେ ୯ ଦଫା ଦାବି ନେଇ ବିସ୍ଥାପିତ ପରିବାରମାନେ ବିକ୍ଷୋଭ ପ୍ରଦର୍ଶନ କରିବା ସହ ରାସ୍ତା ରୋକ କରିଛନ୍ତି । ଏଥିସହିତ ଦାନଗଦି ବ୍ଲକ କାର୍ଯ୍ୟାଳୟ ସମ୍ମୁଖରେ ମଧ୍ୟ ବିକ୍ଷୋଭ ପ୍ରଦର୍ଶନ କରିଛନ୍ତି। ବିକ୍ଷୋଭ ପ୍ରଦର୍ଶନ ଫଳରେ ଯାଜପୁର ରୋଡ଼ ପଟୁ କଳିଙ୍ଗନଗର ଶିଳ୍ପାଞ୍ଚଳକୁ ଗାଡ଼ି ଚଳାଚଳ ବନ୍ଦ ରହିଛି ।
ଅଭିଯୋଗ ମୁତାବକ କଳିଙ୍ଗନଗର ଶିଳ୍ପାଞ୍ଚଳରେ ଗଢ଼ି ଉଠିଥିବା ବିଭିନ୍ନ କାରଖାନା ଦ୍ବାରା ବିସ୍ଥାପିତ ହୋଇଥିବା ପାଖଆଖ ୧୨ଟି ଗ୍ରାମର ବିସ୍ଥାପିତ ପରିବାର ଦାନଗଦି ଠାରେ ଇଡକୋ ଦ୍ବାରା ନିର୍ମିତ ହୋଇଥିବା ତ୍ରିଜଙ୍ଗା ପୁର୍ନଃବାସ କଲୋନୀରେ ରହିଆସୁଛନ୍ତି । ଗତ ୧୯୯୪ ମସିହାରୁ ବସବାସ କରିଆସୁଛନ୍ତି ବିସ୍ଥାପିତ । ତେବେ ଏହି ବିସ୍ଥାପିତଙ୍କ କଲୋଲୀରେ ନାନା ଅସୁବିଧା ଥିବାରୁ ସେମାନେ ଧାରଣାକୁ ଓହ୍ଲାଇଥିଲେ । କଲେନୀରେ ସମସ୍ତ ପ୍ରକାର ସୁବ୍ୟବସ୍ଥା, ରକ୍ଷଣା ବେକ୍ଷଣ ଓ ଉନ୍ନୟନ କାର୍ଯ୍ୟ ପାଇଁ ରାଜ୍ୟ ସରକାର ଇଡକୋକୁ ସମସ୍ତ ଦାୟିତ୍ବ ନ୍ୟସ୍ତ କରିଥିଲେ । ହେଲେ ୧୯୯୫ ମସିହା ପରଠାରୁ ଇଡକୋ ଏହି କଲୋନୀରେ କୌଣସି ରକ୍ଷଣା ବେକ୍ଷଣ କିମ୍ବା ଉନ୍ନୟନମୂଳକ କାର୍ଯ୍ୟ କରିନାହିଁ ।
ଫଳରେ ଏଠାରେ ବସବାସ କରୁଥିବା ବିସ୍ଥାପିତ ପରିବାର ଅନେକ ଅସୁବିଧାର ସମ୍ମୁଖୀନ ହେଉଛନ୍ତି । ଇଡକୋ ବିସ୍ଥାପିତ ପରିବାରମାନଙ୍କ ପାଇଁ ରାସ୍ତା, ଡ୍ରେନ୍, ବିଦ୍ୟୁତ୍, ପାର୍କ, ଖେଳପଡିଆ, ଶ୍ମଶାନ, ଶିକ୍ଷା ଓ ସ୍ବାସ୍ଥ୍ୟ ଆଦି ମୌଳିକ ଅଧିକାର ଯୋଗାଇ ଦେବାରେ ସମ୍ପୁର୍ଣ୍ଣ ବିଫଳ ହୋଇଛି ଇଡକୋ । ଏସବୁ ସମସ୍ୟା ନେଇ ପୂର୍ବରୁ ବାରମ୍ବାର ଇଡକୋ ଓ ଜିଲ୍ଲା ପ୍ରଶାସନକୁ ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ମିଳିନଥିଲା । ତେଣୁ ବାଧ୍ୟହୋଇ ବିସ୍ଥାପିତ ଲୋକେ ଆନ୍ଦୋଳନକୁ ଓହ୍ଲାଇଛନ୍ତି । ୯ ଦଫା ଦାବିରେ କଳିଙ୍ଗନଗର ପ୍ରବେଶ ପଥ ମିଲିଟାରୀ ଛକ ଠାରେ ବିସ୍ଥାପିତ ପରିବାରମାନେ ବିକ୍ଷୋଭ ପ୍ରଦର୍ଶନ କରିବା ସହ ରାସ୍ତା ରୋକ କରିଥିଲା।
ଏହା ମଧ୍ୟ ପଢନ୍ତୁ-ଗଛରେ ପିଟି ହେଲା ଆମ୍ବୁଲାନ୍ସ, 2 ମୃତ
ଏହା ପୂର୍ବରୁ ତ୍ରିଜଙ୍ଗା ବିସ୍ଥାପିତ କଲୋନୀ ତରଫରୁ ସାମ୍ବାଦିକ ସମ୍ମିଳନୀ କରାଯାଇ ସରକାର ତୁରନ୍ତ ଇଡିକୋ ଠାରୁ ଦାୟିତ୍ୱ ପ୍ରତ୍ୟାହାର କରି ବ୍ଲକ ପ୍ରଶାସନକୁ ହସ୍ତାନ୍ତର କରିବାକୁ ଦାବି କରିଥିଲେ । ଯଦି ଏହା ପବରଣ ନହୁଏ ତେବେ ସେ ଧାରଣାକୁ ଓହ୍ଲାଇବେ ବୋଲି ଚେତାବନୀ ଦେଇଥିଲେ ।
