ଯାଜପୁର: ଆମେ ମାସ୍କ ପିନ୍ଧିବୁନି, ଆମର ଠାକୁର ଅଛନ୍ତି। ଆମର କିଛି ହବନି। ଏଭଳି ରୋକଠୋକ ବାଣୀ ଶୁଣାଇଛନ୍ତି ନଗଡାବାସୀ । ଅପହଞ୍ଚ ଓ ଅପପୃଷ୍ଟିର ଇଲାକା ଭାବେ ପରିଚିତ ଯାଜପୁର ଜିଲ୍ଲା ସୁକିନ୍ଦା ବ୍ଲକ ନଗଡାରେ ଦେଖିବାକୁ ମିଳିଛି ଏଭଳି ଘଟଣା । ପାହାଡରେ ପୂଜା ପାଉଥିବା ଖଣ୍ଡୁରାଇ ଠାକୁରାଣୀ କୃପାରୁ ତାଙ୍କୁ କୋଭିଡ ଛୁଇଁ ପାରିବନି ବୋଲି ବିଶ୍ବାସ ରଖି ମାସ୍କ ପିନ୍ଧୁନାହାନ୍ତି ଏହି ଆଦିବାସୀ ଜନଜାତି ।
ଦେଶରେ ବର୍ତ୍ତମାନ ମାସ୍କ ବିନା ଘରୁ ବାହାରିବା ଅସମ୍ଭବ ହୋଇପଡିଥିବା ବେଳେ ଏମିତି ବି ଗାଁ ରହିଛି ଯେଉଁଠି ପୂର୍ବଭଳି ବଞ୍ଚୁଛନ୍ତି ଲୋକେ । ଏହି ଗ୍ରାମକୁ ଗଲେ କୋରୋନା ଭଳି କିଛି ରୋଗ ବର୍ତ୍ତମାନ ଦେଶବାସୀଙ୍କୁ ଗ୍ରାସ କରିଛି ବୋଲି ବୋଧ ହୋଇନଥାଏ । ଏହି ଅଞ୍ଚଳର ଲୋକମାନେ କୋରୋନାର କେବଳ ନାଁ ଶୁଣିଛନ୍ତି, ଏହାର ଭୟାବହତାଠାରୁ ଏମାନେ ସମ୍ପୂର୍ଣ୍ଣ ଅଜ୍ଞ । ପାହାଡ ଉପରେ ଏହି ଜନଜାତି ରହୁଥିବା ବେଳେ କେବଳ ଟାଉଟର ଓ ଠକ ଲୋକଙ୍କୁ କୋରୋନା ହେବ ବୋଲି ଏଠାକାର ଗ୍ରାମବାସୀମାନେ କହିଛନ୍ତି ।
ଆଦିବାସୀ ସମ୍ପଦ୍ରାୟର ଲୋକେ 3ଟି ଭାଗରେ ବିଭକ୍ତ ହୋଇ ନଗଡା, ମଝି ନଗଡା ଓ 11 ହଜାର ଫୁଟ ଉଚ୍ଚରେ ଥିବା ତଳ ନଗଡାରେ ବସବାସ କରୁଛନ୍ତି । ସବୁ ଦିନ ପରି ମହମାରୀ କାଳରେ ମଧ୍ୟ ଏମାନେ ଚିରାଚରିତ ଢଙ୍ଗରେ ଜୀବନଯାପନ କରୁଛନ୍ତି । କେବଳ ତଳକୁ ବଜାର ଯିବା ସମୟରେ ମାସ୍କ ପିନ୍ଧୁଛନ୍ତି ଅନ୍ୟ ସମୟରେ ଏମାନେ ପୂର୍ବଭଳି କାର୍ଯ୍ୟ କରୁଛନ୍ତି । ଏହି ଗ୍ରାମବାସୀମାନେ ନିଜ ଅଞ୍ଚଳରେ କୌଣସି ଗୋଟିଏ ବି କୋଭିଡ ନିୟମ ମାନୁଥିବାରୁ କୋରୋନା ଭୟରେ ଗ୍ରାମରେ ପଶୁନାହାନ୍ତି ସ୍ବାସ୍ଥ୍ୟ ବିଭାଗର ଅଧିକାରୀ ।
ଫଳରେ ସଚେତନତା ବାର୍ତ୍ତା ଅଭାବରୁ ମହାମାରୀ ସମ୍ପର୍କରେ ଆଜି ଅଜ୍ଞ ଏହି ଜନଜାତି । ତେବେ ପାହାଡର ଖଣ୍ଡୁରାଇ ଠାକୁରାଣୀଙ୍କ ଦୟାରୁ ସେମାନଙ୍କୁ କୋରୋନା ଛୁଇଁ ପାରିବନି ବୋଲି କହିଛନ୍ତି ସେଠାକାର ଖୋଦ ନିର୍ବାଚିତ ୱାର୍ଡମେମ୍ବର । ଆମେ ତୁଙ୍ଗା ବେଙ୍ଗା ଖାଇ ରହୁଛୁ, ସେଇଟା ଆମର ଦେଶୀ ମେଡିସିନ। ପାହାଡର ଖଣ୍ଡୁରାଇ ଠାକୁର ଅଛନ୍ତି, ଆମର କିଛି ହେବନାହିଁ ବୋଲି ସେଠାକାର ଲୋକମାନେ କହିଛନ୍ତି । କୋରୋନା ମହାମାରୀ ସମୟରେ ଏଭଳି ଅନ୍ଧବିଶ୍ବାସର ବଶବର୍ତ୍ତୀ ହୋଇଛନ୍ତି ଏଠାକାର ଗ୍ରାମବାସୀ । ତେବେ ସରକାର ସଚେତନତାଧର୍ମୀ ବାର୍ତ୍ତା ପ୍ରଚାର କଲେ ଏଠାକାର ଗ୍ରାମବାସୀ କୋରୋନା ସମ୍ପର୍କରେ ଜାଣି ମାସ୍କ ପିନ୍ଧିବେ ବୋଲି ଆଶା କରାଯାଉଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
