ଯାଜପୁର: ପ୍ରେମରେ ପ୍ରତାରଣା କରି ଜେଲ ଗଲା ଟିକଟକ୍ ହିରୋ । ବିବାହ ପ୍ରତିଶ୍ରୁତି ଦେଇ ପ୍ରେମିକା ସହ କରିଥିଲା ପ୍ରତାରଣା । ଯାଜପୁର ସୁକିନ୍ଦା ବ୍ଲକ ଅନ୍ତର୍ଗତ ଖରଡି ପଞ୍ଚାୟତ ବରଡି ଗ୍ରାମର ଯୁବକ ଶିବୁପ୍ରସାଦ ମଲ୍ଲିକ ଓରଫ୍ ଶିବୁ । ସେହି ଗ୍ରାମ ଜଣେ ଯୁବତୀଙ୍କୁ ଦୁଷ୍କର୍ମ କରିଥିବା ଅଭିଯୋଗ ହୋଇଛି ।
ସୂଚନାନୁଯାୟୀ ଶିବୁ ଦଳିତ ସମ୍ପ୍ରଦାୟର ହୋଇଥିବା ବେଳେ ସେ ସେହି ଗ୍ରାମର ଜଣେ ମୁସଲମାନ୍ ସମ୍ପ୍ରଦାୟର ଝିଅକୁ ବିବାହ ପ୍ରତିଶୃତି ଦେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଦୁଷ୍କର୍ମ ପରେ ସେ ପୀ଼ଡିତାଙ୍କୁ ବିବାହ କରିବା ପାଇଁ ମନା କରିଥିଲା । ଅଭିଯୁକ୍ତ ଶିବୁ ନିଜକୁ ବଞ୍ଚାଇବା ପାଇଁ ଶାସକ ଦଳର ବଡ ବଡ ନେତାଙ୍କ ନିକଟତମ ଲୋକ ବୋଲି କହି ପୀଡିତାଙ୍କ ପରିବାର ଲୋକଙ୍କୁ ବାରମ୍ବାର ଧମକ ଦେଇଆସୁଥିଲା । ଏହା ପରେ ପୀଡିତାଙ୍କ ପରିବାର ଲୋକେ ଅଭିଯୁକ୍ତ ଶିବୁକୁ କାବୁ କରି ସୁକିନ୍ଦା ଥାନା ପୋଲିସକୁ ଧରାଇଥିଲେ । ଘଟଣାସ୍ଥଳରେ ପୋଲିସ ପହଞ୍ଚି ଅଭିଯୁକ୍ତ ଶିବୁକୁ ଗିରଫ କରିଥିବା ଜଣାପଡିଛି । ଉଭୟଙ୍କୁ ଡାକ୍ତରୀ ମାଇନା ପାଇଁ ଦାନଗଦୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଥିଲା ।
ଦୁଷ୍କର୍ମକାରୀ ଅଭିଯୁକ୍ତ ଶିବୁକୁ କଠୋର ଦଣ୍ଡ ଦେବା ପାଇଁ ପୀଡିତାଙ୍କ ବାପା ଦାବି କରିଛନ୍ତି । ଏନେଇ ପୋଲିସ କୌଣସି ପ୍ରତିକ୍ରିୟା ଦେଇନଥିବା ବେଳେ ଅଭିଯୁକ୍ତକୁ ମାମଲା ନମ୍ବର 108/20ରେ କୋର୍ଟ ଚାଲାଣ କରାଯାଇଥିଲା । ସେଠାରେ ଜାମିନ୍ ମଞ୍ଜୁର ନ ହେବାରୁ ଅଭିଯୁକ୍ତକୁ ଜେଲ୍ ହାଜତକୁ ପଠାଯାଇଥିବା ଜଣାପଡିଛି ।
ଯାଜପୁରରୁ ଜ୍ଞାନରଞ୍ଜ ଓଝା, ଇଟିଭି ଭାରତ
