ଯାଜପୁର: ବିଶ୍ୱକର୍ମା ପୂଜାରେ ହୋଇଛି ଅଘଟଣ । ଏଭଳି ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା ଅଧିନ ସାପଗଡ଼ିଆ ଅଞ୍ଚଳରେ । ପୂଜା ସାରି ଘରକୁ ଫେରୁଥିବା ସାପଗଡ଼ିଆ ନିକଟରେ ଟ୍ରେନ ଧକ୍କାରେ ବୃଦ୍ଧ ମୃତ୍ୟୁ ହୋଇଥିବା ନେଇ ଦେଖିବାକୁ ମିଳିଛି । ସୂଚନାନୁସାରେ ଯାଜପୁର ରୋଡ ଥାନା ସାପଗଡ଼ିଆ ଗାଁର ସେକ ଜାଫର ଉତ୍ସବ ପ୍ୟାଲେସ ନିକଟରେ ଥିବା ପ୍ରିନ୍ସ ଟେଲରରେ କାର୍ଯ୍ୟ କରନ୍ତି ।
ତେବେ ଆଜି(ଶୁକ୍ରବାର) ବିଶ୍ୱକର୍ମା ପୂଜା ଥିବାରୁ ବୃଦ୍ଧ ସେକ ଜାଫର ଟେଲର ଦୋକାନକୁ ପୂଜା କରିବାକୁ ଯାଇଥିଲେ । ସେଠାରେ ପୂଜା ସାରି ଘରକୁ ମିଠା ଧରି ଘରକୁ ଫେରୁଥିଲେ । ତେବେ ସେକ ଜାଫର ନାମକ ବୃଦ୍ଧ ଜଣକ ସାପଗଡ଼ିଆସ୍ଥିତ ରେଳ ଲାଇନ ପାର ହୋଇ ଘରକୁ ଯାଉଥିଲେ । ହଠାତ ରେଳ ଧାରଣା ପାର ହେଉଥିବାବେଳେ ଜାଫରଙ୍କୁ ଏକ ମାଲବାହୀ ଟ୍ରେନ ଧକ୍କା ଦେଇଥିଲା ।
ଯାହାଫଳରେ ଜାଫରଙ୍କୁ ଟ୍ରେନ ଧକ୍କା ହେଇଥିବା ସ୍ଥାନୀୟ ଲୋକେ ଦେଖି ଚିକିତ୍ସା ପାଇଁ ଯାଜପୁର ରୋଡ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିଲେ ସୁଦ୍ଧା ଡାକ୍ତର ପ୍ରାଥମିକ ଚିକିତ୍ସା ପରେ ମୃତ ଘୋଷଣା କରିଥିଲେ। ତେବେ ଜାଫରଙ୍କ ମୃତ୍ୟୁ ଖବର ପାଇ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
