ଯାଜପୁର: ରାଜ୍ୟ ସରକାର ଗତ 24ତାରିଖ ଦିନ ଲକଡାଉନ କୋହଳ କରିବା ପରେ ରାଜ୍ୟ ମଧ୍ୟରେ ବସ୍ ଓ ଟ୍ୟାକ୍ସି ଚଳାଚଳ ପାଇଁ ଅନୁମତି ଦେଇଥିଲେ । ସରକାରଙ୍କ ସହ ବହୁ ଆଲୋଚନା ପରେ ଗୁରୁବାର ଠାରୁ ବସ୍ ଚଳାଇବାକୁ ସହମତି ପ୍ରକାଶ କରିଛି ରାଜ୍ୟ ବସ୍ ମାଲିକ ସଂଘ । ଯାଜପୁର ଜିଲ୍ଲାର ଚଣ୍ଡିଖୋଲ ସ୍ଥିତ ଶାନ୍ତିମଣ୍ଡପ ଠାରେ ଅନୁଷ୍ଠିତ ରାଜ୍ୟସ୍ତରୀୟ ଘରୋଇ ବସ୍ ମାଲିକ ସଂଘର ସାଧାରଣ ପରିଷଦ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ଏହି ପରୀପ୍ରେକ୍ଷୀରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏ ସମ୍ପର୍କରେ ବିଧିବଦ୍ଧ ଭାବେ ଘୋଷଣା କରାଯାଇଛି । ଏଥିରେ ଯାଜପୁର ଜିଲ୍ଲା ବସ୍ ମାଲିକ ସଂଘର କର୍ମକର୍ତ୍ତାଙ୍କ ସମେତ ରାଜ୍ୟ ସଂଘର କର୍ମକର୍ତ୍ତା ମଧ୍ୟ ସାମିଲ ଥିଲେ । ତେବେ ପରିସ୍ଥିତି ସ୍ବାଭାବିକ ହେବାକୁ ପ୍ରାୟ ଏକ ମାସ ଲାଗିବ ବୋଲି ବସ୍ ମାଲିକ ସଂଘର କର୍ମକର୍ତ୍ତା କହିଛନ୍ତି । ସରକାରୀ ଘୋଷଣାନାମା ଅନୁଯାୟୀ ବସ୍ ଗୁଡିକ ସେମାନଙ୍କ ସିଟ୍ ଅନୁଯାୟୀ ଯାତ୍ରୀ ପରିବହନ କରିପାରିବେ ବୋଲି କୁହାଯାଇଛି । ବସରେ ଯାତ୍ରା କରିବା ସମୟରେ ଯାତ୍ରୀ ଓ କର୍ମଚାରୀଙ୍କ ମାସ୍କ ପରିଧାନ ବାଧ୍ୟତାମୂଳକ କରାଯିବ । ତେବେ ଦୀର୍ଘ ଦିନର ବ୍ୟବଧାନ ପରେ ରାସ୍ତାରେ ବସ୍ ଗଡୁଥିବାରୁ ଯାତ୍ରୀ ଓ ସାଧାରଣ ଲୋକ ଏହାକୁ ନେଇ ଖୁସି ବ୍ୟକ୍ତ କରିଛନ୍ତି ।
ଲୋକମାନେ କିପରି ସାମାଜିକ ଦୂରତ୍ବ ମାନିବେ ଏବଂ ଯାତ୍ରା ସମୟରେ ସମସ୍ତ ସରକାରୀ ନିୟମ ଅନୁପାଳନ କରିବେ ସେଥିପାଇଁ ବସ୍ ମାଲିକ ସଂଘ ପକ୍ଷରୁ ନିବେଦନ କରାଯାଇଛି । ବସ୍ ଗୁଡିକ ସ୍ଥାନ ଛାଡିବା ପୂର୍ବରୁ ବସ୍ ସହିତ ଏହାର ସିଟ୍ ଓ ଡୋର ଆଦିକୁ ସାନିଟାଇଜ୍ କରିବା ଏବଂ ଯାତ୍ରୀଙ୍କୁ ଚଢିବା ସମୟରେ ସାନିଟାଇଜ୍ କରାଇବା ଏବଂ ମାସ୍କ ପରିଧାନ କରିବା ଉପରେ ଗୁରୁତ୍ବ ଆରୋପ କରାଯାଇଛି । ତେବେ ଗୁରୁବାର ଠାରୁ ଜିଲ୍ଲାର ବିଭିନ୍ନ ସ୍ଥାନରୁ ବସ୍ ଗଡିବାକୁ ସଂଘ ପକ୍ଷରୁ ନିଷ୍ପତ୍ତି ନିଆଯାଇଛି । ଫଳରେ ଯାତ୍ରୀ ବା ସାଧାରଣ ଲୋକଙ୍କ ମଧ୍ୟରେ ଖୁସିର ବାତାବରଣ ଦେଖିବାକୁ ମିଳିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
