ଯାଜପୁର: ଗାଡି ଚୋରି ଘଟଣାରେ ତଲାସ କରିବାକୁ ଯାଇଥିବା ପୋଲିସ କର୍ମଚାରୀଙ୍କୁ ଆକ୍ରମଣ । ଏହି ଘଟଣାରେ ଜଣେ ସବଇନ୍ସପେକ୍ଟର ଓ ୩ ଜଣ କନେଷ୍ଟବଳ ଆହତ ହୋଇଛନ୍ତି । ବର୍ତ୍ତମାନ ସୁଦ୍ଧା ପୋଲିସ ୭ଜଣକୁ ଗିରଫ କରି ତଦନ୍ତ ଜାରି ରଖିଛି । ସୂଚନା ଅନୁସାରେ, ବୈରୀ ଥାନା ଅଞ୍ଚଳରେ ହୋଇଥିବା ଏକ ଗାଡି ଚୋରି ଘଟଣାର ତଦନ୍ତ କରିବାକୁ ଆସି ଏଭଳି ଆକ୍ରମଣର ଶିକାର ହୋଇଛି ପୋଲିସ ।
ଚୋରିର ଲିଙ୍କ୍ ବ୍ରାହ୍ମଣ ବାଛପୁର ଅଞ୍ଚଳର ଥିବା ସୂଚନା ପାଇ ଆଜି(ଶନିବାର) ଗାଁର କବାଡି ଖାନା ଉପରେ ଚଢ଼ାଉ କରିଥିଲା ପୋଲିସ । ଏହାକୁ ସ୍ଥାନୀୟ ଲୋକେ ବିରୋଧ କରିବାପରେ ପୋଲିସ ସହିତ ଧସ୍ତାଧସ୍ତି ହୋଇଥିଲା । ଏପରିକି ପୋଲିସ ଉପରକୁ ଢେଲା ପଥର ମଧ୍ୟ ମାଡ଼ କରିଥିଲେ । ଏଥିରେ 4 ଜଣ ପୋଲିସ ଆହତ ହୋଇଥିବାବେଳେ ପୋଲିସ ଗାଡି ମଧ୍ୟ ଭାଙ୍ଗିଛି ।
ଏନେଇ ସଦର ଥାନାରେ 15 ଜଣଙ୍କ ବିରୁଦ୍ଧରେ ମୋକଦ୍ଦମା ରୁଜୁ ହେବା ପରେ 7 ମହିଳାଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିବା ଏସଡିପିଓ ସୂଚନା ଦେଇଛନ୍ତି । ଅନ୍ୟପଟେ ପୋଲିସ ସାଧା ପୋଷାକରେ ଥିବାରୁ ଜାଣି ପାରିଲୁ ନାହିଁ ବୋଲି ଗିରଫ ମହିଳା ପାଲଟା ଅଭିଯୋଗ କରିଛନ୍ତି । ବର୍ତ୍ତମାନ ସୁଦ୍ଧା ୭ଜଣ ଗିରଫ ହୋଇଥିବାବେଳେ ତଦନ୍ତ ଜାରି ରଖିଛି ପୋଲିସ ।
ଇଟିଭି ଭାରତ, ଯାଜପୁର
