ଯାଜପୁର: ଜିଲ୍ଲାରେ ଦିନକୁ ଦିନ ବାଲି ଚୋରା ଚାଲାଣ ମାମଲା ବୃଦ୍ଧି ପାଇବାରେ ଲାଗିଛି । ଏନେଇ ଗତ କିଛିଦିନ ହେବ ଜିଲ୍ଲା ପ୍ରଶାସନ ପକ୍ଷରୁ ବାଲି ଚୋରାଚାଲାଣକୁ ରୋକିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ କରାଯାଉଛି ।
ଗତକାଲି(ଶୁକ୍ରବାର) ବିଳମ୍ବିତ ରାତିରେ ଯାଜପୁର ତହସିଲ ଓ ପାଣିକୋଇଲି ପୋଲିସ ମିଳିତ ଭାବେ ସଠିପୁର ଛକରେ ଚଢ଼ାଉ କରି ତିନୋଟି ବାଲି ବୋଝେଇ ହାଇୱା ଜବତ କରିଛି । ଜବତ ଗାଡ଼ିଗୁଡିକୁ ପାଣିକୋଇଲି ଥାନାରେ ରଖାଯାଇଛି । ଏହି ଚଢ଼ାଉରେ ଯାଜପୁର ଅତିରିକ୍ତ ତହସିଲଦାର କ୍ଷୀରୋଦ କୁମାର ଦାସ ଓ ଅନ୍ୟ କର୍ମଚାରୀଙ୍କ ସମେତ ପାଣିକୋଇଲି ପୋଲିସ ଉପସ୍ଥିତ ଥିଲେ ।
ସୂଚନା ଅନୁଯାୟୀ ଗତକାଲି(ଶୁକ୍ରବାର) ମଧ୍ୟ ଯାଜପୁର ଜିଲ୍ଲା ଦାନଗଦି ତହସିଲ ଅନ୍ତର୍ଗତ ବାଙ୍ଗୋର ଖୁଣ୍ଟା କୋସେଇ ନଦୀ ବାଲି ଘାଟରୁ ବେଆଇନ ଭାବେ ବାଲି ଚୋରା ଚାଲାଣ ହେଉ ଥିବାବେଳେ ଟମକା ଥାନା ଅଧିକାରୀଣି ସଙ୍ଘମିତ୍ରା ନାୟକ ନଦୀଘାଟରେ ପହଞ୍ଚି 4ଟି ବେଆଇନ ବାଲି ବୋଝେଇ ଟ୍ରକକୁ ଜବତ କରିଥିଲେ । ଏଥିସହ ମାମଲାରେ 4 ଜଣଙ୍କୁ ମଧ୍ୟ ଗିରଫ କରିଥିଲେ । ତେବେ ଜିଲ୍ଲାରେ ବାଲି ଚୋରାଚାଲାଣ ବୃଦ୍ଧି ରାଜସ୍ବହାନୀର ମୁଖ୍ୟ କାରଣ ସାଜିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
