ଯାଜପୁର: ସ୍ଥାନୀୟ ରସୁଲପୁର ବ୍ଳକ କରଜଙ୍ଗ ଗାଁରେ ଏକ ବିରଳ ସାପ ଦେଖାଯିବା ନେଇ ସୃଷ୍ଟି ହୋଇଛି ଗୁଜବ । ସାପ ପରି ଦେଖାଯାଉଥିବା ଏହି ଜୀବଟିର ଲମ୍ବ ପାଖପାଖି 6.5 ମିଟର ଥିବା ବେଳେ ଏହା ଦେଖିବାକୁ ସୂତା ଭଳି ସରୁ । ଏହା ଏତେ ସରୁ କି ଏହାକୁ ସ୍ଥାନୟୀ ଲୋକେ ପ୍ରଥମେ ଗୋଟିଏ ପ୍ଲାଷ୍ଟିକ ତାର ବୋଲି ଭାବୁଥିଲେ । ବୁଧବାର ଭୋର ସମୟରେ କରଜଙ୍ଗ ଗାଁର କଳ୍ପତରୁ ସାହୁଙ୍କ ବାଡିରେ ଏହା ଦେଖିବାକୁ ମିଳିଥିଲା ।
ବିରଳ ସାପ ନେଇ ଗୁଜବ ସୃଷ୍ଟି, ଦେଖିବାକୁ ଜମିଲା ଲୋକଙ୍କ ଭିଡ
ତେବେ ଏଭଳି ଦୃଶ୍ୟ ଦେଖିବାକୁ ଗାଁ ଲୋକଙ୍କ ଭିଡ଼ ଜମିବାରେ ଲାଗିଥିଲା । ଏନେଇ ବନ ବିଭାଗକୁ ଖବର ଦେଲା ପରେ ବନ ବିଭାଗ ଅଧିକାରୀ ଘଟଣାସ୍ଥଳରେ ପହଞ୍ଚି ଏହି ବିରଳ ଜନ୍ତୁଟିକୁ ଉଦ୍ଧାର କରିଥିଲେ । ଗୋଟିଏ ପଟେ ସ୍ଥାନୀୟ ଲୋକେ ଏହାକୁ ବିରଳ ସାପ ବୋଲି କହୁଥିବା ବେଳେ ବନ ବିଭାଗର କହିବା କଥା କି ଏହା କୌଣସି ସାପ ନୁହେଁ ବରଂ ଏକ ଜିଆ ଜାତୀୟ ଜୀବ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
