ଯାଜପୁର: ସୁକିନ୍ଦା ଥାନା ପାଟପୁର ଅଞ୍ଚଳରେ ଗତ ୨୦୧୯ ମସିହାରେ ହୋଇଥିବା ଦୁଷ୍କର୍ମ ଘଟଣାର ମୁଖ୍ୟ ଅଭିଯୁକ୍ତ ସବ୍ୟସାଚୀ ବେହେରାଙ୍କୁ ୨୦ ବର୍ଷ ସଶ୍ରମ କାରାଦଣ୍ଡ ଓ ୫୦ ହଜାର ଟଙ୍କା ଜୋରିମାନାରେ ଦଣ୍ଡିତ କଲେ ଯାଜପୁର ରୋଡ଼ କୋର୍ଟର ଅତିରିକ୍ତ ଜିଲ୍ଲା ଓ ଦୌରାଜଜ । ୧୦ ଜଣ ସାକ୍ଷ୍ୟ ପ୍ରମାଣ ଆଧାରରେ ଏହି ଦଣ୍ଡାଦେଶ ଦେଇଛନ୍ତି କୋର୍ଟ । ସୂଚନା ମୁତାବକ ଗତ ୨୧.୦୪.୨୦୧୯ ତାରିଖରେ ସବ୍ୟସାଚୀ ବେହେରା ସୁକିନ୍ଦା ଥାନା ପାଟପୁର ଛକରେ ଏକ ବୋଲେରୋ ଗାଡି ରଖି ପାନ ଦୋକାନକୁ ସଫଲ ଖାଇବାକୁ ଯାଇଥିଲା । ଏହି ସମୟରେ ଜନୈକ ଦୋକାନୀ ଝିଅକୁ ସଫଲ ମାଗିଥିଲା । ସବ୍ୟସାଚୀକୁ ସଫଲ ଦେବାକୁ ହାତ ବଢ଼େଇବା ବେଳେ ସେ ତାକୁ ଘୋଷାରି ଆଣି ବୋଲେରୋ ଗାଡ଼ିରେ ଜୋର ଜବରଦସ୍ତ ବସାଇ ଆଣିଥିଲା ।
ବିଭିନ୍ନ ସ୍ଥାନରେ ବୁଲାଇ ଶେଷରେ ଯାଜପୁର ରୋଡ ଥାନା ଧବଳଗିରିସ୍ଥିତ ଏକ ଘରୋଇ ଆଇଟିଆଇ ସେଣ୍ଟରରେ ରଖି ସେ ଆଉ ତା’ର ସହଯୋଗୀ ଗଣ ଦୁଷ୍କର୍ମ କରିଥିଲେ । ଏହି ଘଟଣାର ଆଜି(ଶନିବାର) ଯାଜପୁର ରୋଡ କୋର୍ଟର ଅତିରିକ୍ତ ଜିଲ୍ଲା ଓ ଦୌରା ଜଜ ମାନସ କୁମାର ପଣ୍ଡା ଶୁଣାଣି କରିଛନ୍ତି । ସୁକିନ୍ଦା ଥାନା କେସ ନମ୍ବର ୧୧୭/୨୦୧୯ ଦଫା ୩୭୬ (ଡି)୩୬୬ ଆଇପିସିରେ ଶୁଣାଣି କରି ୨୦ ବର୍ଷ ଜେଲ ସହିତ ୫୦ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଛନ୍ତି । ଉକ୍ତ କେଶକୁ ଯାଜପୁର ରୋଡ କୋର୍ଟର ସରକାରୀ ଓକିଲ ରଜତ କୁମାର ରାଉତ ପରିଚାଳନା କରୁଥିଲେ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
