ଯାଜପୁର: ଓଡିଆ ଜନମାନସରେ ଜନ୍ମାଷ୍ଟମୀର ଏକ ସ୍ବତନ୍ତ୍ରତା ରହିଛି । ଜନ୍ମାଷ୍ଟମୀର ପର ଦିନ ପାଳନ ହୁଏ ନନ୍ଦୋତ୍ସବ । ଏହି ପରମ୍ପରାକୁ ଦୃଷ୍ଟିରେ ରଖି ଯାଜପୁର ଜିଲ୍ଲା ରସୁଲପୁର ବ୍ଲକ ମାଣତିର ଗାଁରେ ପ୍ରତିବର୍ଷ ବେଶ ଆଡମ୍ବର ସହକାରେ ପାଳିତ ହୋଇଛି ଜନ୍ମାଷ୍ଟମୀ ଓ ନନ୍ଦୋତ୍ସବ । ଦୀର୍ଘ ବର୍ଷ ଧରି ଏଠାରେ ପାଳିତ ହୋଇଆସୁଛି ଏହି ଉତ୍ସବ । ଗାଁ ମଦନ ମୋହନଜୀଉ ସାଂସ୍କୃତିକ ପରିଷଦ ପକ୍ଷରୁ ଆୟୋଜିତ ଏହି ଉତ୍ସବ 3 ଦିନ ବ୍ୟାପି ପାଳିତ ହୋଇଥିଲା । ଯାହାକୁ ଦେଖିବା ଲାଗି ଜିଲ୍ଲା ତଥା ଜିଲ୍ଲା ବାହାରୁ ଛୁଟି ଆସିଥାନ୍ତି ଶ୍ରଦ୍ଧାଳୁ ।
ଉତ୍ସବରେ କୁନି କୁନି ପିଲାମାନେ ରାଧାକୃଷ୍ଣ, ଗୋପାଳ ଆଦି ବିଭିନ୍ନ ବେଶରେ ସୁସଜ୍ଜିତ ହୋଇଥାନ୍ତି । ଯାହା ଉତ୍ସବର ମୁଖ୍ୟ ଆକର୍ଷଣ । ପରମ୍ପରା ଅନୁଯାୟୀ ଏକ ବିରାଟ ପଟୁଆରେ ନନ୍ଦ ରାଜା ନଗର ପରିକ୍ରମା କରିବା ସହ ଲଡୁ ବାଣ୍ଟିଥାନ୍ତି । ଗାଁର ଯୁବକଙ୍କ ପାଇଁ ଲଉଡି ଖେଳ, ଦଧିହାଣ୍ଡି ଭଙ୍ଗା କାର୍ଯ୍ୟକ୍ରମ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ । ପୂଜ୍ୟପୂଜା, ନାରାୟଣ ସେବା, ଗୀତିନାଟ୍ୟ, ଜଣାଅଜଣା ଭଳି କାର୍ଯ୍ୟକ୍ରମ ମାଧ୍ୟମରେ ପରିଷଦ ପକ୍ଷରୁ ବିଜେତାଙ୍କୁ ପୁରସ୍କୃତ ଓ ସମ୍ବର୍ଦ୍ଧିତ କରାଯାଇଥାଏ ।
କୃଷ୍ଣଙ୍କ ଲୀଳାଖେଳାକୁ ମନେ ରଖିବା ସହ ପୁରାତନ ପରମ୍ପରାକୁ ବଞ୍ଚାଇ ରଖିବାକୁ ମାଣତିର ଗ୍ରାମବାସୀଙ୍କ ଏହି ପ୍ରୟାସ ବେଶ ପ୍ରଶଂସନୀୟ । ଚଳିତ ବର୍ଷ ମଧ୍ୟ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ରଖିଥିବା ବ୍ୟକ୍ତିବିଶେଷଙ୍କୁ ପରିଷଦ ପକ୍ଷରୁ ସମ୍ବର୍ଦ୍ଧିତ କରାଯାଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
