ଯାଜପୁର: ଭୋକର ଭୂଗୋଳ ନଗଡ଼ାରେ ପ୍ରତ୍ୟେକ ପରିବାର ନିକଟରେ ପହଞ୍ଚିବ ଚାଉଳ ଏବଂ ପ୍ରତିଷ୍ଠା ହେବ ଇକୋ ଲଜିଷ୍ଟିକ ପାର୍କ। ଏବେ ଚାଉଳ ପାଇଁ ଆଉ ଯିବାକୁ ପଡିବନି 15 କିଲୋମିଟର ଦୂର ଚିଙ୍ଗୁଡ଼ିପାଳକୁ। ଘର ପାଖରେ ଆସି ପହଞ୍ଚିଯିବ ଚାଉଳ। ଆତ୍ମନିର୍ଭରଶୀଳ ହେବା ନିମନ୍ତେ ଘରେ ଘରେ ବସିବ ମହୁ ଚାଷ ତିଆରି ସେଟ୍ । ଏଥିସହିତ ରାସ୍ତାଘାଟ, ସ୍ବାସ୍ଥ୍ୟ, ପାନୀୟଜଳ, ବିଦ୍ୟୁତ ଯୋଗାଣ କାର୍ଯ୍ୟର ଅଗ୍ରଗତି ତ୍ବରାନ୍ବିତ କରାଯିବା ସହ ନଗଡ଼ାରେ ପ୍ରତିଷ୍ଠା କରାଯିବ ଇକୋ ଲଜିଷ୍ଟିକ ପାର୍କ।
ଶୁକ୍ରବାର ଭୋକର ଭୂଗୋଳ ଯାଜପୁର ଜିଲ୍ଲାର ନଗଡା ଗସ୍ତରେ ଆସି ଏହିସବୁ ପରିକଳ୍ପନା କରିଛନ୍ତି ଶିଳ୍ପ ଓ ଶକ୍ତି ମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର । ସ୍ଥାନୀୟ ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡାଇଙ୍କ ସହ ନଗଡ଼ାରେ ମଧ୍ୟାହ୍ନରେ ପହଞ୍ଚି 2 ଘଣ୍ଟା ଧରି ବିଭିନ୍ନ ବିଭାଗର ଅଧିକାରୀଙ୍କ ସହ ଆଲୋଚନା କରି କିଭଳି ଏହିସବୁ କାର୍ଯ୍ୟର ଅଗ୍ରଗତି ହୋଇପାରିବ, ସେ ଦିଗରେ ତୁରନ୍ତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି ।
୨୦୧୬ ଜୁଲାଇ ମାସରେ ନଗଡ଼ାରେ 19 ଜଣ ନିଷ୍ପାପ ଶିଶୁଙ୍କ ଅପପୃଷ୍ଟି ଯୋଗୁଁ ମୃତ୍ୟୁ ଘଟିବା ଖବର ଗଣମାଧ୍ୟମରେ ପ୍ରସାରିତ ହେବାପରେ କେନ୍ଦ୍ର ଠାରୁ ରାଜ୍ୟ ପର୍ଯ୍ୟନ୍ତ ହଇଚଇ ସୃଷ୍ଟି ହୋଇଥିଲା । ତେବେ ଏହାପରେ କୋଟି କୋଟି ଟଙ୍କା ବ୍ୟୟ କରାଯାଇ ରାସ୍ତା ନିର୍ମାଣ, ପାନୀୟ ଜଳ ଯୋଗାଣ, ବିଦ୍ୟୁତ, ଶିକ୍ଷା ସହ ସ୍ବାସ୍ଥ୍ୟ ବ୍ୟବସ୍ଥା ନଗଡାବାସୀଙ୍କୁ ଯୋଗାଇ ଦେବାକୁ ଅନେକ ପଦକ୍ଷେପ ନିଆଯାଇଛି । ହେଲେ ସବୁ କାର୍ଯ୍ୟ ଅଧାପନ୍ତରିଆ ହୋଇ ପଡିରହିଛି। ସବୁବେଳେ ମନ୍ତ୍ରୀ, ନେତା, ବିଧାୟକ, ଅଫିସର ଆସୁଛନ୍ତି କିନ୍ତୁ ଖାଲି କହି ଦେଇଯାଉଛନ୍ତି, ହେଲେ କାମ କିଛି ହେଉନାହିଁ ବୋଲି ନଗଡାବାସୀ ଅଭିଯୋଗ କରିଛନ୍ତି । ଏହାସହିତ ମନ୍ତ୍ରୀଙ୍କୁ ଆସନ୍ତା 15 ଦିନ ମଧ୍ୟରେ ଚାକିରୀ ଯୋଗାଇ ଦେବା ନିମନ୍ତେ ଏକ ଦାବିପତ୍ର ମଧ୍ୟ ପ୍ରଦାନ କରିଛନ୍ତି ।
ତେବେ ନଗଡାବାସୀଙ୍କୁ ସବୁ ଯୋଗାଇ ଦେଇ ସମାଜର ମୁଖ୍ୟ ସ୍ରୋତରେ ସାମିଲ ନିମନ୍ତେ ସରକାର ଅନେକ ଯୋଜନା କରୁଛନ୍ତି । ହେଲେ ସେମାନଙ୍କ ସଚେତନତା ଉପରେ ଅଧିକ କାର୍ଯ୍ୟକ୍ରମ କରିଲେ ନଗଡାବାସୀ ଅନ୍ଧାରରୁ ସମ୍ପୂର୍ଣ୍ଣ ଆଲୋକକୁ ଆସିପାରନ୍ତେ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
