ଯାଜପୁର: ଅଗ୍ନିକାଣ୍ଡରେ ଘର ସହ ଜଳି ଗଲା ସୁନାର ସଂସାର । ବୋଝ ଉପରେ ନଳୀତା ବିଡ଼ା ପରି ଗରିବ ପରିବାର ମୁଣ୍ଡରେ ଏହି ଅଗ୍ନିକାଣ୍ଡ ଚଡ଼କ ପକାଇଛି । ଏହି ଭୟାବହ ଅଗ୍ନିକାଣ୍ଡ ଜିଲ୍ଲାର ରସୁଲପୁରୁ ବ୍ଲକ ଲକ୍ଷ୍ମୀନଗର ପଞ୍ଚାୟତର ରାଧାନଗର ଗାଁରେ ବୁଧବାର ରାତିରେ ଘଟିଛି । ଅଗ୍ନିକାଣ୍ଡରେ 3ଟି ଯୌଥ ପରିବାରର 14 ବଖରା ଘର ସହିତ ଲକ୍ଷାଧିକ ସମ୍ପତ୍ତି ଜଳି ଯାଇଛି ।
ଏହି ଅଗ୍ନିକାଣ୍ଡର ପ୍ରକୃତ କାରଣ ଜଣାପଡିନଥିବା ବେଳେ ଗ୍ୟାସ୍ ଚୁଲାରୁ ନିଆଁ ଲାଗିଥିବା ସନ୍ଦେହ କରାଯାଉଛି । ଅଗ୍ନିବିପନ୍ନ ଗରିବ ଶ୍ରେଣୀର ହୋଇଥିବା ବେଳେ ରାତିରେ ଘଟିଥିବା ଅଗ୍ନିକାଣ୍ଡ ତାଙ୍କୁ ବେସାହାରା କରିଦେଇଛି । ଅଗ୍ନିକାଣ୍ଡରେ ସମ୍ପୂର୍ଣ୍ଣ ଘର ସହିତ ଆସବାବପତ୍ର ଓ ପ୍ରାୟ 25 ଲକ୍ଷରୁ ଉର୍ଦ୍ଧ୍ବ ଟଙ୍କାର ସମ୍ପତ୍ତି ନଷ୍ଟ ହୋଇଯାଇଛି ।
ଏହି ଅସହାୟମାନଙ୍କୁ ପଡ଼ୋଶୀ ସାହାଯ୍ୟ କରୁଥିବା ବେଳେ ସ୍କୁଲଘରେ ଅସ୍ଥାୟୀ ଭାବେ ଥଇଥାନ କରାଯାଇ ପଲିଥିନ, କମ୍ବଳ ଓ ଶୁଖିଲା ଖାଦ୍ୟ ଆଦି ବଣ୍ଟନ କରାଯାଇଛି । ବିପନ୍ନ ପରିବାରଙ୍କୁ ସରକାରୀ ଯୋଜନାରେ ପକ୍କାଘର ଯୋଗାଇଦେବାକୁ ଗ୍ରାମବାସୀମାନେ ଦାବି କରିଛନ୍ତି ।
ରସୁଲପୁର ବିଡିଓ ଅଗ୍ନିବିପନ୍ନଙ୍କ ପାଖରେ ପହଞ୍ଚି ପଲିଥିନ୍ ଓ ରିଲିଫ୍ ସାମଗ୍ରୀ ଯୋଗାଇ ଦେଇଛନ୍ତି । ସେପଟେ ତହସିଲ ପ୍ରଶାସନ ପକ୍ଷରୁ କ୍ଷୟକ୍ଷତିର ଆକଳନ କରାଯାଉଛି । ସେମାନଙ୍କୁ ସରକାରୀ ବ୍ୟବସ୍ଥା ଅନୁଯାୟୀ ସହାୟତା ରାଶି ଓ ପ୍ରଧାନମନ୍ତ୍ରୀ ଆବାସ ଗୃହ ଆଦି ଯୋଗାଇ ଦେବାକୁ ପ୍ରତିଶୃତି ଦେଇଛନ୍ତି ବିଡିଓ ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
