ଯାଜପୁର: ଅଚନାକ ହସ୍ପିଟାଲ ପରିଦର୍ଶନରେ ଯାଜପୁର ସାଂସଦ ସର୍ମିଷ୍ଠା ସେଠୀ ଓ କୋରେଇ ବିଧାୟକ ଅଶୋକ ବଳ । ରବିବାର ହଠାତ୍ ସେମାନେ ଯାଜପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପରିଦର୍ଶନ କରି ମେଡିକାଲର ପରିମଳ ଓ ବ୍ୟବସ୍ଥାଗତ ସମସ୍ୟା ସମ୍ପର୍କରେ ଅବଗତ ହେବା ସହ ପ୍ରତି ୱାର୍ଡ ବୁଲି ରୋଗୀମାନଙ୍କ ଠାରୁ ସ୍ବାସ୍ଥ୍ୟସେବା ସମ୍ପର୍କରେ ପଚାରି ବୁଝିଥିଲେ।
ଏଥିସହ ଦୀର୍ଘ ଦିନ ଧରି ଖାଲି ପଡିଥିବା ଡାକ୍ତର ପଦବୀ ସମ୍ପର୍କରେ ଜାଣିବାକୁ ପାଇ ଏ ଦିଗରେ ରାଜ୍ୟ ସରକାରଙ୍କ ସହିତ ଆଲୋଚନା କରି ଡାକ୍ତରି ପଦବୀ ପୁରଣ କରିବା ପାଇଁ ଚେଷ୍ଟା କରିବେ ବୋଲି କହିଥିଲେ। ଏହାଛଡା ଡାକ୍ତରଖାନା ପରିସରରେ ଥିବା ରକ୍ତ ଭଣ୍ଡାର, ମହିଳା ୱାର୍ଡ, ଜେନେରାଲ ୱାର୍ଡ, ଡ୍ରେସିଂ ରୁମ୍ ଓ ପୁଷ୍ଟିସାଧନ କେନ୍ଦ୍ର ବୁଲି ଦେଖିବା ସହ କାର୍ଯ୍ୟରତ କର୍ମଚାରୀଙ୍କଠାରୁ ବିଭିନ୍ନ ସମସ୍ୟା ସମ୍ପର୍କରେ ପଚାରି ବୁଝିଥିଲେ ।
ସ୍ବାସ୍ଥ୍ୟକେନ୍ଦ୍ର ପରିଦର୍ଶନ ପରେ କଳିଙ୍ଗନଗର ଉନ୍ନୟନ ପରିଷଦରୁ ଜମି କ୍ରୟ କରି ବସବାସ କରୁଥିବା କେଏନଡିଏ କଲୋନୀର ସମସ୍ୟା ସମ୍ପର୍କରେ ଅଭିଯୋଗ ପାଇ ସାଂସଦ ଶ୍ରୀମତୀ ସେଠୀ ଓ ବିଧାୟକ ଶ୍ରୀବଳ ଘଟଣାସ୍ଥଳ ବୁଲି ଦେଖିଥିଲେ । ଏହି ସମୟରେ ସାଂସଦ ଶ୍ରୀମତୀ ସେଠୀ କେଏନଡିଏ ଯନ୍ତ୍ରୀଙ୍କୁ ଜଙ୍ଗଲ ଭ୍ରମ ସୃଷ୍ଟି କରୁଥିବା ବିଭିନ୍ନ ପ୍ଲଟକୁ ସଫା କରିବାକୁ ନିର୍ଦ୍ଦେଶ ଦେଇଥିଲେ । ଏଥିସହ କଲୋନୀ ପରିସରରେ ନୂଆ କରି ରାସ୍ତା ନିର୍ମାଣ ପାଇଁ ପ୍ରୋଜେକ୍ଟ ପ୍ରସ୍ତୁତ କରିବାକୁ ଯନ୍ତ୍ରୀଙ୍କୁ କହିବା ସହ ତାଙ୍କୁ ଏ ସମ୍ପର୍କରେ ଅବଗତ କରାଇବାକୁ କହିଥିଲେ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
