ଯାଜପୁର: ନଭେମ୍ବର 3ରୁ ଆଇ.ଏନ.ଟି.ୟୁ.ସି ପକ୍ଷରୁ ରାଜ୍ୟବ୍ୟାପୀ ଆନ୍ଦୋଳନ ଗୁରୁବାର ଶେଷ ହୋଇଛି । ତେବେ ଜିଲ୍ଲାର ବିଭିନ୍ନ ସମସ୍ୟାକୁ ନେଇ 22 ଦଫା ଦାବି କରି ଜିଲ୍ଲାପାଳ ଓ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲା ଆଇ.ଏନ.ଟି.ୟୁ.ସି ।
ମିଳିଥିବା ସୂଚନା ମୁତାବକ, ରାଜ୍ୟର ସମସ୍ତ ଜିଲ୍ଲାରେ ବିଦ୍ୟୁତ ଶୁଳ୍କ ବୃଦ୍ଧି, ଘରୋଇକରଣ ବନ୍ଦ କରିବା, କଳିଙ୍ଗନଗରରେ ବନ୍ଦ ରହିଥିବା ସମସ୍ତ କଳକାରଖାନାକୁ ତୁରନ୍ତ କାର୍ଯ୍ୟକ୍ଷମ କରିବା ଆଦି 22ଦଫା ଦାବି ଆଇ.ଏନ.ଟି.ୟୁ.ସି ପକ୍ଷରୁ ରଖାଯାଇଥିଲା । ଏହି ଆନ୍ଦୋଳନରେ ଗୁରୁବାର ରାଷ୍ଟ୍ରୀୟ ମଜଦୁର କଂଗ୍ରେସର ଶତାଧିକ ସଦସ୍ୟ ଓ କର୍ମକର୍ତ୍ତା ଦାନଗଦି ବ୍ଲକ୍ ମାନପୁର ଓଭରବ୍ରିଜ୍ ରାସ୍ତାରେ ବିକ୍ଷୋଭ ପ୍ରଦର୍ଶନ କରିଥିଲେ ।
କଳିଙ୍ଗନଗର ଶିଳ୍ପାଞ୍ଚଳର ବିଭିନ୍ନ କାରଖାନାର ଶ୍ରମିକ କର୍ମଚାରୀ ମଧ୍ୟ ଏହି ଆନ୍ଦୋଳନରେ ସାମିଲ ହୋଇଥିଲେ । କଳିଙ୍ଗନଗର ଶିଳ୍ପାଞ୍ଚଳରେ ଗୋଟେ ପରେ ଗୋଟେ କାରଖାନା ବନ୍ଦ ହେବା, ଶ୍ରମିକ ମାନଙ୍କୁ ରାତିଅଧିଆ ଛଟେଇ କରାଯିବା, ଏକ ମାତ୍ର ରାଷ୍ଟ୍ରାୟତ୍ତ ଉଦ୍ୟୋଗଭାବେ ନୀଳାଚଳ ଇସ୍ପାତ ନିଗମକୁ ଘରୋଇକରଣ କରିବା ଆଦି ପ୍ରସଙ୍ଗକୁ ନେଇ ପ୍ରତିବାଦ କରାଯାଇଥିଲା । ଗୁରୁବାର ପୂର୍ବାହ୍ନରେ ଶତାଧିକ ଶ୍ରମିକ କର୍ମଚାରୀମାନେ ମାନପୁର ଓଭର ବ୍ରିଜ ତଳ ରାସ୍ତାର ଦୁଇ ପାର୍ଶ୍ବରେ ରହି ପ୍ରତିବାଦ କରିଥିବା ଦେଖିବାକୁ ମିଳିଥିଲା ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
