ଯାଜପୁର: ଧର୍ମଶାଳା ବ୍ଲକ୍ ହରିଦାସପୁର ପଞ୍ଚାୟତ ପିଇଓ ସ୍ମିତାରାଣୀ ବିଶ୍ବାଳ ମୃତ୍ୟୁ ଘଟଣାର ବଦଳୁଛି ମୋଡ । ବିରୋଧିଙ୍କ ଦ୍ବାରା ଘଟଣାର ସିବିଆଇ ତଦନ୍ତ ଦାବି କରାଯାଇଥିବା ବେଳେ ଅଭିଯୁକ୍ତ ରୂପେଶ ଭଦ୍ରଙ୍କ ଗେଷ୍ଟହାଉସ ସରକାରୀ ଜମିରେ ଅବସ୍ଥିତ ଥିବା ଦର୍ଶାଯାଇଛି । ଏହି ଗେଷ୍ଟହାଉସରେ ହିଁ ଘଟିଥିଲା ସ୍ମିତାରାଣୀଙ୍କର ମୃତ୍ୟୁ । ତଦନ୍ତରୁ ଜମିର ସ୍ଥିତି ସମ୍ପର୍କରେ ସ୍ପଷ୍ଟ ହେବା ପରେ ସ୍ଥାନୀୟ ତହସିଲ ପ୍ରଶାସନ ପକ୍ଷରୁ ଶୁକ୍ରବାର ଗେଷ୍ଟହାଉସକୁ ଜଉମୁଦରେ ସିଲ୍ କରାଯାଇଛି ।
ଗତ ୧୬ ତାରିଖରେ ଧର୍ମଶାଳା ବ୍ଲକ ହରିଦାସପୁର ପଞ୍ଚାୟତ ପିଇଓ ସ୍ମିତାରାଣୀ ବିଶ୍ବାଳଙ୍କ ମୃତଦେହ ଏହି ଗେଷ୍ଟହାଉସରୁ ଉଦ୍ଧାର ହୋଇଥିଲା । ଯାହାକୁ ନେଇ ଏବେ ବି ରାଜ୍ୟ ରାଜନୀତି ସରଗରମ ରହିଛି । ଏଥି ମଧ୍ୟରେ ତହସିଲ ପ୍ରଶାସନ ପକ୍ଷରୁ ଗେଷ୍ଟହାଉସକୁ ସିଲ୍ କରାଯିବା ସହ ଗେଷ୍ଟହାଉସର ବିଦ୍ୟୁତ ସରବରାହକୁ ବିଚ୍ଛିନ୍ନ କରିଦିଆଯାଇଛି । ଏହାସହ ଜମି ଉପରେ ନାଲି ପତାକା ପୋତି 144 ଧାରା ଜାରି କରାଯାଇଛି । ତେବେ ଏ ସମ୍ପର୍କରେ ପଚରାଯାଇଥିବା ବେଳେ ସମ୍ପୃକ୍ତ ତହସିଲଦାର କିମ୍ବା ପୋଲିସ ଅଧିକାରୀ ମନ୍ତବ୍ୟ ଦେଇନାହାନ୍ତି ।
ସ୍ମିତାରାଣୀଙ୍କ ମୃତ୍ୟୁ ଏକ ହତ୍ୟାକାଣ୍ଡ ଓ ଗେଷ୍ଟହାଉସଟି ସରକାରୀ ଜମିରେ ଅବସ୍ଥିତ ଥିବା ଅଭିଯୋଗରେ ଦର୍ଶାଯାଇଥିଲା । ଯାହାକୁ ନେଇ ବିରୋଧୀ ଦଳ ଭାବେ ଉଭୟ ବିଜେପି ଏବଂ କଂଗ୍ରେସ ରାଜରାସ୍ତାକୁ ଓହ୍ଲାଇଥିଲେ । ଏହା ପରେ ଜମିର ସ୍ଥିତି ସମ୍ପର୍କରେ ଅନୁଧ୍ୟାନ କରି ଧର୍ମଶାଳା ତହସିଲ ପ୍ରଶାସନ ଏ ନେଇ ଜିଲ୍ଲାପାଳଙ୍କୁ ରିପୋର୍ଟ ପ୍ରଦାନ କରିଥିଲେ । ଶୁକ୍ରବାର ସ୍ଥାନୀୟ ତହସିଲଦାରଙ୍କ ଦ୍ବାରା ଏହି ବିଲଡିଂ ଏବଂ ଜାଗା ଉପରେ 144 ଧାରା ଜାରି ହେବା ସହ ଗେଷ୍ଟହାଉସକୁ ସିଲ ମଧ୍ୟ କରାଯାଇଛି । ଏପରିକି ଏହି ବିଲଡିଂକୁ ଦିଆଯାଇଥିବା ବିଦ୍ୟୁତ୍ ସଂଯୋଗ ମଧ୍ୟ ବିଚ୍ଛିନ୍ନ କରାଯାଇଛି । ତେବେ ଏହା ସମ୍ଭବ ହେଲା କିପରି ବୋଲି ବିଭିନ୍ନ ମହଲରେ ପ୍ରଶ୍ନ ଉଠାଯାଇଛି । ସରପଞ୍ଚଙ୍କ ସ୍ବାମୀ ରୂପେସ୍ ଭଦ୍ର ସରକାରୀ ଜମିରେ ଏତେ ବଡ ସୌଧ ନିର୍ମାଣ କଲେ କିପରି ସାଧାରଣରେ ପ୍ରଶ୍ନ ଉଠିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
