ଯାଜପୁର: ବୟସର ଅପରାହ୍ନରେ ଘାରିଛି ପରିବାର ପ୍ରତିପୋଷଣ ଚିନ୍ତା । ଦୁଇ ପୁଅଙ୍କ ସହ ଦୁର୍ଦ୍ଦିନରେ ଦିନ କାଟୁଛନ୍ତି ଅସହାୟ ବୃଦ୍ଧା । ସବୁ ବାପା ମାଆଙ୍କ ଆଶା ଥାଏ ପୁଅଟିଏ ହେଲେ ବୃଦ୍ଧ ବୟସରେ ସାହାରା ସାଜିବ । ହେଲେ ଯାଜପୁର ଜିଲ୍ଲା ଦାନଗଦି ବ୍ଲକ ତେଲିବାହାଳୀ ଗାଁରେ ରହୁଥିବା ଏକ ପରିବାର ପାଇଁ ଏହା ସ୍ବପ୍ନ ପାଲଟିଛି । ଜଣେ ବୃଦ୍ଧାଙ୍କର ୨ଟି ପୁଅ ଥିବାବେଳେ କମ ବୟସରେ ଉଭୟ ମସ୍ତିଷ୍କ ରୋଗରେ ପୀଡିତ । ଗତ କିଛିଦିନ ତଳେ ରୋଗଗ୍ରସ୍ତ ହୋଇ ଆରପାରିକୁ ଚାଲିଗଲେ ଵୃଦ୍ଧାଙ୍କ ସ୍ୱାମୀ । ସ୍ୱାମୀଙ୍କ ମୃତ୍ୟୁ ପରେ ଦୁଇ ପୁଅଙ୍କୁ ମୁହଁରେ ମୁଠାଏ ଆହାର ଯୋଗାଇବା ପାଇଁ ବହୁ ସଂଘର୍ଷ କରୁଛନ୍ତି ବୃଦ୍ଧା । ଅଭାବ ଅନାଟନ ଭିତରେ ସେ ସଂଘର୍ଷମୟ ଜୀବନ କାଟୁଛନ୍ତି ।
ତେଲିବାହାଳୀ ଗାଁରେ ରହୁଛନ୍ତି ଭାଗିରଥୀଙ୍କ ସ୍ତ୍ରୀ ବିଲେଇ ନାୟକ, ବଡ଼ ପୁଅ ଲକ୍ଷ୍ମୀଧର ନାୟକ ଓ ସାନ ପୁଅ ନିମେଇଁ ନାୟକ । ଭାଗିରଥୀ ସ୍ଥାନୀୟ ଅଞ୍ଚଳରେ ମୂଲମଜୁରୀ କରି ନିଜ ପରିବାର ପ୍ରତିପୋଷଣ କରୁଥିଲେ । ହେଲେ ହଠାତ୍ ଭାଗିରଥୀଙ୍କ ମୃତ୍ୟୁ ପରେ ତାଙ୍କ ସ୍ତ୍ରୀଙ୍କ ଉପରେ ଦୁଃଖର ପାହାଡ ଭାଙ୍ଗିପଡିଛି । ପଡୋଶୀଙ୍କ ଘରୁ ମାଗି ଯାଚି ଆଣି ସେ ପରିବାର ଚଳାଉଛନ୍ତି । ଏଭଳି ସ୍ଥିତିରେ ଏହି ପରିବାରକୁ ସହଯୋଗର ହାତ ବଢାଇବାକୁ ଦାବି କରିଛନ୍ତି ସ୍ଥାନୀୟ ବାସିନ୍ଦା ।
ଏହା ବି ପଢନ୍ତୁ...ବିଛଣାରେ ରୋଜଗାରିଆ ପୁଅ, ଚିକିତ୍ସାରେ ଅର୍ଥ ସାଜିଛି ବାଧକ
ଏହା ବି ପଢନ୍ତୁ...ବଞ୍ଚିବା ପାଇଁ ଏକା ଲଢ଼ୁଛି ବୋହୁ, ମାଗୁଛି ସହାୟତା
ଅସହାୟ ଲୋକଙ୍କୁ ମୁଖ୍ୟସ୍ରୋତକୁ ଆଣିବା ପାଇଁ ସରକାର ଏବେ ମାଳମାଳ ଯୋଜନା କରୁଛନ୍ତି । ମାତ୍ର କିଛି ସରକାରୀ ଅଧିକାରୀଙ୍କ ପାଇଁ ଏହି ଯୋଜନା ହିତାଧିକାରୀଙ୍କ ନିକଟରେ ପହଞ୍ଚି ପାରୁନାହିଁ । ଅସହାୟ ବୃଦ୍ଧା ବିଲେଇ ନାୟକଙ୍କ ପରିବାର କ୍ଷେତ୍ରରେ ଏହାର ଉଦାହରଣ ଦେଖିବାକୁ ମିଳିଛି । ଏହି ପରିବାର ନିକଟରେ ମୁଣ୍ଡ ଗୁଞ୍ଜିବାକୁ ଘରଟିଏ ନାହିଁ । ଭଙ୍ଗା ଦଦରା ପାଲ ଟାଣି ଘରେ ରହୁଛନ୍ତି ଵୃଦ୍ଧା ବିଲେଇ ନାୟକ ଓ ତାଙ୍କ ଦୁଇ ପୁଅ । ସେପଟେ ବିଧବା ଭତ୍ତା ଏବଂ ଆବାସ ଘର ବି ମିଳିନାହିଁ । ସେପଟେ ଏହି ଘଟଣା ସମ୍ପର୍କରେ ଦାନଗଦି ବିଡିଓ ସାରଦା ପ୍ରସନ୍ନ ପଣ୍ଡା କହିଛନ୍ତି, "ଏଭଳି ଖବର ପୂର୍ବରୁ ଆମ ନିକଟକୁ ଆସିନାହିଁ । ଏକ ଟିମ୍ ପଠାଯାଇ ଏହି ଘଟଣାର ତଦନ୍ତ କରାଯିବ । ତଦନ୍ତ ପରେ ଆବଶ୍ୟକ ଅନୁଯାୟୀ ସମସ୍ତ ସରକାରୀ ସାହାଯ୍ୟ ଯୋଗାଇ ଦିଆଯିବ।"
ଇଟିଭି ଭାରତ, ଯାଜପୁର
