ଭୁବନେଶ୍ବର: ବରୀ ନାବାଳିକା ଦୁଷ୍କର୍ମ ଓ ହତ୍ୟା ଘଟଣାକୁ ଦେଢ ମାସ ବିତିଲାଣି । ହେଲେ ଏବେ ବି ପୋଲିସର ହାତ ଖାଲି । ଏହି ଜଘନ୍ୟ ହତ୍ୟାକାଣ୍ଡ ମାମଲାରେ ପୋଲିସର ନିଷ୍କ୍ରିୟତା ନେଇ NHRC ତଦନ୍ତ ଦାବି ହୋଇଛି । ପୀଡିତା ପରିବାରକୁ ୨୦ ଲକ୍ଷ ଟଙ୍କା କ୍ଷତିପୂରଣ ସହିତ ମାମଲାରେ କେନ୍ଦ୍ର ମାନବ ଅଧିକାର କମିଶନ(NHRC)ଙ୍କ ତଦନ୍ତ ପାଇଁ ନିବେଦନ କରିଛି ଭାରତୀୟ ବିକାଶ ପରିଷଦ । ପରିଷଦର ଜଗତସିଂହପୁର ଜିଲ୍ଲା ସଭାପତି ସୁବ୍ରତ କୁମାର ଦାଶ NHRCଙ୍କ ନିକଟରେ ଏହି ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ, ଗତ ଫେବୁଆରୀ 17 ତାରିଖରେ ଯାଜପୁର ଜିଲ୍ଲା ବରୀ ରାମଚନ୍ଦ୍ରପୁର ଥାନା ଅଞ୍ଚଳରେ ଏହି ଜଘନ୍ୟ ହତ୍ୟାକାଣ୍ଡ ଘଟିଥିଲା । କିଛି ଦୁର୍ବୃତ୍ତ ନାବାଳିକାଙ୍କୁ ଦୁଷ୍କର୍ମ କରିବା ପରେ ଅତି ନିର୍ମମ ଭାବେ ହତ୍ୟା କରିଥିଲେ ଏବଂ ମୃତଦେହକୁ ଗାଁ ପୋଖରୀରେ ଫୋପାଡ଼ି ଦେଇଥିଲେ । ଏହି ଘଟଣାରେ ବରୀ ରାମଚନ୍ଦ୍ରପୁର ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ମାମଲାକୁ ଚାପି ଦେଇଥିବା ଅଭିଯୋଗ ହୋଇଥିଲା ।
ଘଟଣାର ପ୍ରାୟ ଦେଢ଼ ମାସ ପରେ ପୋଷ୍ଟମର୍ଟମ ରିପୋର୍ଟ ଆସିବା ପରେ ସ୍ପଷ୍ଟ ହୋଇଥିଲା ଯେ ଉକ୍ତ ନାବାଳିକାକୁ ଦୁଷ୍କର୍ମ ପରେ ଅତି ନିର୍ମମ ଭାବେ ହତ୍ୟା କରାଯାଇଛି । ପୋଲିସ ବିଭାଗ ଷଡଯନ୍ତ୍ର କରି ପ୍ରଭାବଶାଳୀ ଲୋକଙ୍କ ଚାପରେ ଏହି ମାମଲାକୁ ଚାପି ଦେଇଥିବାର ଅଭିଯୋଗ ଆସିଥିଲା । ଏହି ହତ୍ୟାକାଣ୍ଡକୁ ନେଇ ସମଗ୍ର ଜିଲ୍ଲାର ବିଭିନ୍ନ ମହଲରେ ଉଦବେଗ ପ୍ରକାଶ ପାଉଛି।
ଭୁବନେଶ୍ବରୁ ବିକାଶ କୁମାର ଦାସ, ଇଟିଭି ଭାରତ
