ଯାଜପୁର: ସ୍କୁଲ ବାରଣ୍ଡାରେ ଚାଲୁଛି ଅଙ୍ଗନୱାଡି କେନ୍ଦ୍ର । ଖରା ଓ ବର୍ଷାରେ ଦିନ କାଟୁଛନ୍ତି କୋମଳମତି ଛାତ୍ରଛାତ୍ରୀ । ଏମିତି ଦୃଶ୍ୟ ଦେଖିବାକୁ ମିଳିଛି ଯାଜପୁର ଜିଲ୍ଲା ବ୍ୟାସନଗର ଖଣ୍ଡାହତା ଅଙ୍ଗନବାଡି କେନ୍ଦ୍ରରେ । ଯାହାକୁ ନେଇ ସ୍ଥାନୀୟବାସୀ ଅଭିଯୋଗ କରିଥିଲେ ହେଁ କୌଣସି ସୁଫଳ ମିଳୁ ନଥିବା ଅଭିଯୋଗ ହୋଇଛି ।
ତେବେ ଏହି ସମସ୍ୟା ଦୀର୍ଘଦିନ ଧରି ଚାଲୁଥିବାବେଳେ ବିପଦସଙ୍କୁଳ ଅବସ୍ଥାରେ ଛାତ୍ରଛାତ୍ରୀ ପାଠ ପଢ଼ୁଛନ୍ତି । ବାରମ୍ବାର ଅଭିଯୋଗ ସତ୍ବେ ମଧ୍ୟ କେହି ଶୁଣିବାକୁ ନାହାଁନ୍ତି । ବର୍ଷର 12ମାସ ଖରାବର୍ଷାରେ ଛାତ୍ରଛାତ୍ରୀ ବାରଣ୍ଡାରେ ବସି ପାଠ ପଢ଼ୁଛନ୍ତି । ଏହାସହ ଏହି ଅଙ୍ଗନବାଡି କେନ୍ଦ୍ରରେ ରୋଷେଇ ମଧ୍ୟ ହେଉନଥିବା ଜଣାପଡିଛି ।
ଯାହାକୁ ନେଇ ଅଭିଭାବକଙ୍କ ମହଲରେ ଦେଖାଦେଇଛି ଅସନ୍ତୋଷ । ଏସଂପର୍କରେ ସ୍ଥାନୀୟବାସୀ ବାରମ୍ବାର ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ହେଁ ଆଜି ଯାଏଁ କୌଣସି ସୁଫଳ ମିଳିପାରି ନାହିଁ । କଳିଙ୍ଗନଗର ଅତିରିକ୍ତ ଜିଲ୍ଲାପାଳ ସନ୍ତୋଷ କୁମାର ମିଶ୍ର ଖୁବଶୀଘ୍ର ଏହି କେନ୍ଦ୍ର ପାଇଁ ପକ୍କା ଘର ଯୋଗାଇ ଦେବାକୁ ପ୍ରତିଶୃତି ଦେଇଛନ୍ତି ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
