ଯାଜପୁର:''ଯେଉଁଠି ଅଛୁ ପୁ୍ଅ ତୁ ଜଲଦି ପଳେଇ ଆସେ । ଘରେ ତତେ ତୋ ମା,ବାପା,ଦାଦା ଓ ଦାଦୀ ସମସ୍ତେ ଅପେକ୍ଷା କରିଛନ୍ତି।'' ଏମିତି କିଛି କହି ନିଜର ହଜିଲା ପୁଅକୁ ଖୋଜିବା ପାଇଁ ପୋଲିସକୁ ଆକୁଳ ନିବେଦନ କରିଛନ୍ତି ବାପା ଓ ମାଆ । କାରଣ 4ଦିନ ହେବ ରୁଷିଲା ପୁଅ ଘରୁ ଯାଇଛି ଯେ ଆଉ ଫେରିନି। ଏଭଳି ଘଟଣା ଘଟିଛି ଯାଜପୁର ରୋଡ ଥାନା ଅନ୍ତର୍ଗତ ଗାୟତ୍ରୀ ବିହାର ଅଞ୍ଚଳରେ ।
ସୂଚନା ଥାଉକି,ଦୀର୍ଘ ଚାରିଦିନ ହେଲା ଜଣେ ଅଷ୍ଟମ ଶ୍ରେଣୀରେ ପଢ଼ୁଥିବା ଛାତ୍ର ନିଖୋଜ ହୋଇଛି । ଏ ବିଷୟରେ ଥାନାରେ ଅଭିଯୋଗ ପରେ ବି ଅଦ୍ୟାବଧି ପୋଲିସ କୌଣସି ସୁରାକ ପାଇପାରୁନାହିଁ। ଏପଟେ ଯାଜପୁର ରେଳ ଷ୍ଟେସନ ପାଖରୁ ପୁଅର ସାଇକେଲ ମିଳିବା ଘଟଣା ମାମଲାକୁ ଜଟିଳ କରିବା ସହ ମନରେ ଅନେକ ସନ୍ଦେହ ସୃଷ୍ଟି କରୁଛି।
ଘଟଣାରୁ ପ୍ରକାଶ ଯେ, ଯାଜପୁର ରୋଡ ଥାନା ଅନ୍ତର୍ଗତ ଗାୟତ୍ରୀ ବିହାର ଅଞ୍ଚଳର ଛାତ୍ର ଅନୁପ ସିଂ। ସେ ସ୍ଥାନୀୟ ଦଳା ଠାରେ ଥିବା ଏକ ଘରୋଇ ସ୍କୁଲରେ ଅଷ୍ଟମ ଶ୍ରେଣୀର ପଢୁଥିଲେ। ହେଲେ ଗତ ଶୁକ୍ରବାର ରାତିରେ ଘରେ ମୋବାଇଲରେ ଖେଳିବାକୁ ନେଇ ଅନୁପର ମାଆ ତାଙ୍କୁ ଆକଟ କରିଥିଲେ। ଏଥିରେ ରାଗିଯାଇ ଅନୁପ ତା ପରଦିନ ଅର୍ଥାତ ଶନିବାର ସକାଳୁ ସ୍କୁଲ ଯାଉଛି କହି ଆଉ ଫେରିନଥିଲେ।
ଏପଟେ ଯାଜପୁର ରୋଡ ରେଳ ଷ୍ଟେସନରେ ନିଜର ସାଇକେଲ ରଖି କୌଣସି ଟ୍ରେନ ଯୋଗେ କେଉଁଆଡ଼େ ଚାଲିଯାଇଥିବାର ଥାନାରେ ଅଭିଯୋଗ କରିଛନ୍ତି ଅନୁପର ବାପା। ଏପଟେ ପୁଅକୁ ନପାଇ ଘରେ ମାଆ, ବାପାଙ୍କ ଅବସ୍ଥା ଶୋଚନୀୟ ହୋଇପଡିଛି। ଏ ସମ୍ପର୍କରେ ପୋଲିସର ପ୍ରତିକ୍ରିୟା ମିଳିପାରିନଥିବା ବେଳେ ପୁଅକୁ ଶୀଘ୍ର ଖୋଜି ଆଣିଦେବାକୁ ବାପା, ମାଆ ଆକୁଳ ନିବେଦନ କରିଛନ୍ତି।
ଯାଜପୁରରୁ ଜ୍ଞାନରଞ୍ଜନ ଓଝା,ଇଟିଭି ଭାରତ
