ଯାଜପୁର: କୁନି ପୁଅର କମାଲ । ବୟସ ମାତ୍ର ପାଞ୍ଚ । ହେଲେ ପ୍ରଖର ରହିଛି ସ୍ମରଣ ଶକ୍ତି । ସ୍କୁଲରେ ପାଦ ରଖିନି ସିନା ଇଣ୍ଡିଆ ବୁକ୍ ଅଫ୍ ରେକର୍ଡରେ ସ୍ଥାନ ପାଇଛି । ହଁ ଆଜ୍ଞା କଥାଟା ଶୁଣିବାକୁ ଆଶ୍ଚର୍ଯ୍ୟ ଲାଗୁଛି । ହେଲେ ଏହା ସତ । ଆମେ କହୁଛୁ ଯାଜପୁର ଜିଲ୍ଲା ବ୍ୟାସନଗର ଅଞ୍ଚଳର କୁନି ପୁଅ ଜନ୍ମେଜୟ ମହାନ୍ତିଙ୍କ କଥା । ଯିଏକି ମାତ୍ର 5 ବର୍ଷରେ ଇଣ୍ଡିଆ ବୁକ୍ ଅଫ୍ ରେକର୍ଡ୍ସରେ ସ୍ଥାନ ପାଇଛନ୍ତି ।
24 ଘଣ୍ଟାରେ ଲେଖିଲେ 2 ହଜାରରୁ ଊର୍ଦ୍ଧ୍ବ ଇଂରାଜୀ ଶବ୍ଦ
ମାତ୍ର 24ଘଣ୍ଟା ମଧ୍ୟରେ ନିର୍ଭୁଲ ଭାବେ 2 ହଜାରରୁ ଉର୍ଦ୍ଧ୍ବ ଇଂରାଜୀ ଶବ୍ଦ ଲେଖି ଇଣ୍ଡିଆ ବୁକ୍ ଅଫ୍ ରେକର୍ଡରେ ସ୍ଥାନ ପାଇଛନ୍ତି ସେ । ବିସ୍ମୟ ବାଳକର ପ୍ରଖର ସ୍ମୃତି ଶକ୍ତି ଯୋଗୁଁ ପିଲାଟି ଏବେ ଚର୍ଚ୍ଚାକୁ ଆସିଛି । ବ୍ୟାସନଗର ଅଞ୍ଚଳର ଧନଞ୍ଜୟ ମହାନ୍ତି ଓ ଲୋପାମୁଦ୍ରା ମହାନ୍ତିଙ୍କ ସାନ ପୁଅ ଜନ୍ମେଜୟ । ପାଟିରୁ ଠିକସେ କଥା ବାହାରୁ ନଥିଲେ ମଧ୍ୟ କଅଁଳ ବୟସରେ କରିଛନ୍ତି ବଡ ରେକର୍ଡ । କୁନି ପୁଅର ଏଭଳି ସଫଳତା ଦେଖି ବେଶ ଆନନ୍ଦିତ ପରିବାର ଲୋକେ ।
ଜନ୍ମେଜୟଙ୍କ ବାପା ଧନଞ୍ଜୟ ମହାନ୍ତି ଦଶରଥପୁର ଅଞ୍ଚଳର ହୋଇଥିଲେ ହେଁ ବ୍ୟାସନଗରରେ ରହି କଳିଙ୍ଗନଗର ଶିଳ୍ପାଞ୍ଚଳର ଜିନ୍ଦଲ ଷ୍ଟେନଲେଶ୍ କାରଖାନାରେ କ୍ବାଲିଟି କଣ୍ଟ୍ରୋଲ ବିଭାଗରେ ମ୍ୟାନେଜର ଭାବେ କାର୍ଯ୍ୟରତ ଅଛନ୍ତି । ସେହିପରି ମା ଲୋପାମୁଦ୍ରା ମହାନ୍ତି ଜଣେ ଉଚ୍ଚ ଶିକ୍ଷିତା ମହିଳା ହୋଇଥିଲେ ହେଁ ସେ ହେଉଛନ୍ତି ଜଣେ ଗୃହିଣୀ । ତେବେ ସ୍କୁଲ ମାଟି ମାଡି ନ ଥିଲେ ବି ଇଂରାଜୀ ଲିଖନ ଓ ପଠନରେ ସମସ୍ତ ପ୍ରଶ୍ନର ସଠିକ ଉତ୍ତର ଦେଇ ଇଣ୍ଡିଆ ବୁକ୍ ଅଫ୍ ରେକର୍ଡର ବିଚାରକମଣ୍ଡଳୀଙ୍କୁ ଆଶ୍ଚର୍ଯ୍ୟଚକିତ କରିଦେଇଥିଲେ ଜନ୍ମେଜୟ । ତାଙ୍କର ଏହି ସଫଳତା ପାଇଁ ପରିବାର ଲୋକେ କାହିଁକି ପୁରା ଜିଲ୍ଲାବାସୀ ବେଶ ଗର୍ବିତ ।
