ଯାଜପୁର: ଧର୍ମଶାଳା ତହସିଲ ପକ୍ଷରୁ ବିଭିନ୍ନ ସ୍ଥାନରେ ଚଢାଉ କରାଯାଇ ଜବତ ହୋଇଛି 25 ହାଇୱା ଓ ଟ୍ରକ । ବେଆଇନ ଭାବେ କଳାପଥର ପରିବହନ କରୁଥିବା ଏହି ଗାଡିକୁ ଧର୍ମଶାଳା ତହସିଲ ଅନ୍ତର୍ଗତ ବିଭିନ୍ନ ସ୍ଥାନରେ ବ୍ୟବହାର କରାଯାଉଥିବା ଅଭିଯୋଗ ହୋଇଛି । ଏହି ଅଞ୍ଚଳର ବିଭିନ୍ନ ବେଆଇନ ଖାଦାନରୁ ମାଫିଆମାନେ କଳାପଥର ଉତ୍ତୋଳନ କରି ଅନ୍ୟତ୍ର ଚାଲାଣ କରୁଥିବା ମଧ୍ୟ ଅଭିଯୋଗ ହୋଇଛି ।
ସୂଚନା ଅନୁଯାୟୀ ତହସିଲ ପକ୍ଷରୁ ବିଭିନ୍ନ ସମୟରେ ଚଢାଉ କରାଯାଉଥିବା ବେଳେ ଅନେକ ସମୟରେ ମାଫିଆମାନେ ଚକମା ଦେଇ ଖସିଯାଇଥାନ୍ତି । ହେଲେ ସୋମବାର ଧର୍ମଶାଳା ତହସିଲଦାର ଧର୍ମଶାଳା ଓ ଜେନାପୁର ପୋଲିସ ସହାୟତାରେ ଜାତୀୟ ରାଜପଥର ଚଢେଇଧରା, ବରଡା, ଆରୁହା, ଶୁଭଦ୍ରାପୁରଠାରେ ପରିବହନ ହେଉଥିବା ଗାଡିଗୁଡିକୁ ଯାଞ୍ଚ କରାଯାଇଥିଲା ।
ଏଥିରେ ବେଆଇନ ଭାବେ ପରିବହନ ହେଉଥିବା ଗାଡିଗୁଡିକୁ ଜବତ କରି ବିଭିନ୍ନ ଥାନାରେ ରଖାଯାଇଛି । ଏହି ଗାଡିଗୁଡିକରୁ ଜୋରିମାନା ଆଦାୟ କରାଯାଇ ଛଡାଯିବ ବୋଲି ତହସିଲଦାର ପ୍ରକାଶ କରିଛନ୍ତି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
