ଜଗତସିଂହପୁର : ୧୧ ଦଫା ଦାବି ନେଇ ଆରଆଇ କାର୍ଯ୍ୟାଳୟ ସମ୍ମୁଖରେ ଅହୋରାତ୍ର ଧାରଣା । ଦାବି ପୂରଣ ନହେବା ଯାଏଁ ଏହି ଧାରଣା ଜାରି ରହିବ ବୋଲି ଚେତାବନୀ ଦେଇଛନ୍ତି ଜଗତସିଂହପୁର ଜିଲ୍ଲା ରଘୁନାଥପୁର ବ୍ଲକ ଅନ୍ତର୍ଗତ ରେଢୁଆ ଗ୍ରାମବାସୀ । ଗତ 28 ତାରିଖଠାରୁ ଏହି ଗଣଧାରଣା ଦିଆଯାଇଥିବା ବେଳେ ଆଜି ଏହି ଧାରଣା ଦ୍ୱିତୀୟ ଦିନରେ ପହଞ୍ଚିଛି ।
ଜଗତସିଂହପୁର ଜିଲ୍ଲା ଭଳି ଏକ ଆଗୁଆ ଜିଲ୍ଲାରେ ଏହି ଅଞ୍ଚଳକୁ ଅଣଦେଖା କରାଯାଉଥିବା ଗ୍ରାମବାସୀ ଅଭିଯୋଗ ଆଣିଛନ୍ତି । ରେଢୁଆ ଗାଁକୁ ଯିବା ଆସିବା କରିବା ପାଇଁ ରାସ୍ତା ନାହିଁ । ଫଳରେ ଏଠାକାର ବାସିନ୍ଦା ଯାତାୟତ ସମୟରେ ନାନା ଅସୁବିଧା ଭୋଗୁଛନ୍ତି ।
ଜିଲ୍ଲା ସଦରମହକୁମାଠାରୁ ମାତ୍ର 10 କିଲୋମିଟର ଦୂର ହୋଇଥିବା ବେଳେ ଏହି ଗ୍ରାମକୁ ସଂଯୋଗ କରିବା ପକ୍କା ରାସ୍ତାଟିଏ ନାହିଁ । ତେଣୁ କୌଣସି ଜରୁରୀ କାମ ପଡ଼ିଲେ ଯିବାଆସିବା ସମୟରେ ଏଠିକାର ଲୋକେ ଅନେକ ଅସୁବିଧା ଭୋଗୁଛନ୍ତି ।
ସେହିପରି ଏଠାରେ ସ୍ବାସ୍ଥ୍ୟ ସେବା ପାଇଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରଟିଏ ରହିଛି । ହେଲେ ଡାକ୍ତର ରହୁନାହାଁନ୍ତି । ଫଳରେ ରୋଗୀସେବା ବାଧାପ୍ରାପ୍ତ ହେଉଛି । ଏଠାରେ ଡାକ୍ତରଙ୍କୁ ନିଯୁକ୍ତି ପାଇଁ ବାରମ୍ବାର ଅଭିଯୋଗ ହେଉଥିଲେ ମଧ୍ୟ କେହି ଶୁଣୁ ନାହାଁନ୍ତି । ଫଳରେ ରୋଗୀମାନେ ଚିକିତ୍ସା ନପାଇ ହନ୍ତସନ୍ତ ହେଉଛନ୍ତି । ଗର୍ଭବତୀମାନେ ବହୁ ସମୟରେ ହଇରାଣ ହୋଇ ଅକଥନୀୟ ଯନ୍ତ୍ରଣା ଭୋଗନ୍ତି ।
ଅନ୍ୟପକ୍ଷରେ ଅଞ୍ଚଳର ଛାତ୍ରଛାତ୍ରୀଙ୍କୁ ଉଚ୍ଚ ଶିକ୍ଷା ଦେବା ପାଇଁ ପାଖରେ କଲେଜର ସୁବିଧା ନଥିବାରୁ ପିଲାମାନେ ଅଧା ପାଠପଢ଼ାରୁ ଡୋରି ବାନ୍ଧୁଛନ୍ତି । ଅଞ୍ଚଳରେ ଥିବା ଏକମାତ୍ର ବୃନ୍ଦାବନ ଚନ୍ଦ୍ର ମହାବିଦ୍ୟାଳୟରେ +2 ବିଜ୍ଞାନ ପଢ଼ିବାର ସୁବିଧା ରହିଛି । ହେଲେ +3 ପଢିବା ପାଇଁ ଛାତ୍ରଛାତ୍ରୀଙ୍କୁ 15 କିଲୋମିଟର ଦୂରବାଟ ଯିବାକୁ ପଡୁଛି । ଯାହାକୁ ନେଇ ସମସ୍ୟାରେ ପଡୁଛନ୍ତି ଛାତ୍ରଛାତ୍ରୀ । ତେଣୁ ଏମାନଙ୍କ ଭବିଷ୍ୟତ ଅନ୍ଧାରକୁ ଠେଲି ହେଇଯାଉଛି । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଗ୍ରାମବାସୀ ।
ଜିଲ୍ଲାର ଏହି ଅଞ୍ଚଳଟି ଚାଷବନ୍ଦୀ ଅଞ୍ଚଳ । ହେଲେ ଚାଷୀମାନେ ଶାଗ ମାଛ ଦରରେ ନିଜର ଉତ୍ପାଦ ବିକ୍ରୟ କରନ୍ତି । ଏନେଇ ସରକାର ଓ ପ୍ରଶାସନ ନିକଟରେ ବାରମ୍ବାର ଦାବି କରାଯାଉଥିଲେ ମଧ୍ୟ ଏଠାରେ ଏକ ଶୀତଳ ଭଣ୍ଡାର ନିର୍ମାଣ କରାଯାଇ ପାରିନାହିଁ ।
ଏଭଳି ବିଭିନ୍ନ ସମସ୍ୟାକୁ ନେଇ ସ୍ଥାନୀୟ ଲୋକମାନେ ଜିଲ୍ଲାପାଳଙ୍କଠାରୁ ଆରମ୍ଭ କରି RDC ଓ ମୁଖ୍ୟମନ୍ତ୍ରୀଙ୍କ ପର୍ଯ୍ୟନ୍ତ ଅଭିଯୋଗ କରି ଆସିଥିଲେ ମଧ୍ୟ କୌଣସି ସୁଫଳ ମିଳୁ ନାହିଁ । ଫଳରେ ଗ୍ରାମବାସୀ ବାଧ୍ୟ ହୋଇ RI ଅଫିସ ସମ୍ମୁଖରେ ଗଣଧାରଣା ଦେଇଛନ୍ତି ।
ଇଟିଭି ଭାରତ, ଜଗତସିଂହପୁର
