ଜଗତସିଂହପୁର: ଉନ୍ନୟନମୂଳକ କାର୍ଯ୍ୟରେ ଦୁର୍ନୀତି ଅଭିଯୋଗରେ ସରପଞ୍ଚଙ୍କୁ ଘେରିଲେ ଗ୍ରାମବାସୀ । ଏପରି ଘଟଣା ଦେଖିବାକୁ ମିଳିଛି ଜଗତସିଂହପୁର ଏରସମା ବ୍ଲକ ଅନ୍ତର୍ଗତ ଚଟୁଆ ପଞ୍ଚାୟତରେ । ପୋଖରୀ ଖୋଳାରେ ଅନିୟମିତତାକୁ ନେଇ ଆଜି ଗ୍ରାମବାସୀଙ୍କ ପକ୍ଷରୁ ସ୍ଥାନୀୟ ସରପଞ୍ଚ ଓ ତାଙ୍କ ଶ୍ବଶୁରଙ୍କୁ ଅଟକ ରଖିଥିବା ଦେଖିବାକୁ ମିଳିଥିଲା । ପରେ ଘଟଣା ସମ୍ପର୍କରେ ଖବର ପାଇ ଉଭୟଙ୍କୁ ପୋଲିସ ଗ୍ରାମବାସୀଙ୍କ ଠାରୁ ଉଦ୍ଧାର କରିଛି ।
ଘଟଣାକୁ ନେଇ ମିଳିଥିବା ସୂଚନା ଅନୁସାରେ, ଏରସମା ବ୍ଲକ ଚଟୁଆ ପଞ୍ଚାୟତର ପାରପରା ଗ୍ରାମର ଏକ ପୋଖରୀରୁ ପଙ୍କ ଉଦ୍ଧାର ଓ ନବୀକରଣ ବାବଦରେ 1ଲକ୍ଷ ଟଙ୍କାର ବ୍ୟୟ ବରାଦ କରାଯାଇଥିଲା । କିନ୍ତୁ ବିନା କାମରେ ଚଞ୍ଚକତା କରି ବିଲ ପାସ କରାଇ ନିଆଯାଇଥିବା ଗ୍ରାମବାସୀ ଜାଣିବାକୁ ପାଇଥିଲେ । ପୋଖରୀ ସାମ୍ନାରେ ଫଳକ ଲଗାଇ ଅର୍ଥ ଲୁଟ କରାଯାଇଥିବା ଅଭିଯୋଗ କରି ଆଜି ଶତାଧିକ ଲୋକ ସରପଞ୍ଚ ଓ ତାଙ୍କ ଶ୍ବଶୁରଙ୍କୁ ଅଟକ ରଖିଥିଲେ। ଖବର ପାଇ ଏରସମା ପୋଲିସ ସେଠାରେ ପହଞ୍ଚି ସରପଞ୍ଚ ଓ ତାଙ୍କ ଶ୍ବଶୁରଙ୍କୁ ଉଦ୍ଧାର କରିଥିଲେ। ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
