ଜଗତସିଂହପୁର: ସାଧବ ପରମ୍ପରାକୁ ନେଇ କୁମାରୀମାନେ ଭାଇଙ୍କ ଶୁଭ ମନାସୀ ଭାଦ୍ରବ ମାସରେ ମା ଖୁଦୁରୁକୁଣୀଙ୍କ ପୂଜା କରିଥାନ୍ତି । ଓଡିଶାର ବିଭିନ୍ନ ସ୍ଥାନରେ ଏହି ପୂଜା କରାଯାଇଥାଏ । ଜଗତସିଂହପୁର ଜିଲ୍ଲାରେ ବିଭିନ୍ନ ସ୍ଥାନରେ ମଧ୍ୟ ଏହି ପୂଜା କରାଯାଇଥାଏ । ହେଲେ ସଦର ଥାନା ଅନ୍ତର୍ଗତ କେନ୍ଦାଳ ଗ୍ରାମରେ ମା ଖୁଦୁରୁକୁଣୀଙ୍କ ପୂଜା ପରମ୍ପରା ପ୍ରାୟ ହଜାର ବର୍ଷର । ଏହି ଗ୍ରାମରେ ବେଶ ନିଆରା ଭାବରେ ଏହି ପୂଜା ଅନୁଷ୍ଠିତ ହୋଇଥାଏ ।
କେନ୍ଦାଳ ଗ୍ରାମର କୁମାରୀ ଓ ସଧବା ମହିଳା ମାନଙ୍କ ଦ୍ଵାରା 4 ପାଳି ଓଷା ପରେ ମାଆଙ୍କ ମୃଣ୍ମୟୀ ମୃର୍ତ୍ତି ପୂଜା କରାଯାଏ । ମାଆଙ୍କୁ ବୈଦିକ ରୀତିରେ ପାଞ୍ଚ ଦିନ ଧରି ଆଡମ୍ବର ସହକାରେ ପୂଜାର୍ଚ୍ଚନା କରାଯିବା ସହ କାଳିକା ନାଚ ପ୍ରଦର୍ଶିତ ହୋଇଥାଏ । ଏହି ଅଞ୍ଚଳରେ କାଳିକା ନାଚ କଳାକୁ ବେଶ ନିଖୁଣ ଭାବରେ ଗ୍ରାମବାସୀମାନେ ପ୍ରଦର୍ଶିତ କରିଥାନ୍ତି । ଯାହାକୁ ଦେଖିବାକୁ ପାଇଁ ଜିଲ୍ଲା ଭିତରୁ ଓ ବାହାରୁ ପ୍ରବଳ ଜନସମାଗମ ହୋଇଥାଏ ।
ପାଞ୍ଚ ଦିନ ପୂଜା ପାଇବା ପରେ ଗ୍ରାମରୁ ମା ବିଦାୟ ନେଇଥାନ୍ତି । ଏହି ମେଲାଣି ଉତ୍ସବରେ ସାମିଲ ହୋଇଥାନ୍ତି ପଚିଶଟି ମେଢ। । ଏହି ଅବସରରେ ଆଧୁନିକ ଓ ପାରମ୍ପରିକ ବାଦ୍ୟରେ ଦୁଲୁକି ଉଠେ ସମଗ୍ର ଅଞ୍ଚଳ । ବିରାଟ ଶୋଭାଯାତ୍ରାରେ ବାହାରିବା ସହ ଶେଷରେ ମାଆଙ୍କୁ ଅଳକା ନଦୀରେ ବିସର୍ଜିତ କରାଯାଇଥାଏ । ବ୍ୟାପକ ଜନଗହଳି ପାଇଁ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥାଏ । ହଜାର ବର୍ଷର ପରମ୍ପରାକୁ ବହନ କରିଥିବା ଏହି ଖୁଦୁରୁକୁଣୀ ଯାତ୍ରା ବେଶ ଅନନ୍ୟ ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
