ଜଗତସିଂହପୁର: ଜିଲ୍ଲାର ସଦଦ୍ଭାବନା ସଭାଗୃହରେ ଚାଲିଛି ନିଲାମ ପ୍ରକ୍ରିୟା । ଜିଲ୍ଲା ଅବକାରୀ ବିଭାଗ ପକ୍ଷରୁ ଜିଲ୍ଲାପାଳଙ୍କ ଉପସ୍ଥିତିରେ ଦୁଇଟି ଦେଶୀ ଓ ୭ଟି ବିଦେଶୀ ମଦ ଦୋକାନ ପାଇଁ ନିଲାମ ପ୍ରକ୍ରିୟା ଅନୁଷ୍ଠିତ ହୋଇଛି । ଏଥିରେ ୫୮୦ ଜଣ ନିଲାମ ଧରି ଅଂଶଗ୍ରହଣ କରିଥିଲେ । ପୂର୍ବରୁ 27ଟି ମଦ ଦୋକାନ ନିଲାମ ପ୍ରକ୍ରିୟା ସାରିଥିବାବେଳେ ଆଜି ଆଉ 9ଟି ର ନିଲାମ ପ୍ରକ୍ରିୟା ଶେଷ ହୋଇଛି ।
ତେବେ ଜିଲାରେ ମଦ ଦୋକାନ ସଂଖ୍ୟା 36କୁ ବୃଦ୍ଧି ପାଇଛି । ବୁଧବାର ଏହି ନିଲାମ ପ୍ରକ୍ରିୟାରେ ପାରାଦ୍ୱୀପ ଅଠର ବାଙ୍କୀର ଗୋଟିଏ ଦେଶୀ ମଦ ଦୋକାନ ଥିବାବେଳେ ଷଣ୍ଢକୁଦରେ 1ଟି ମଦ ଦୋକାନ ରହିଛି । ସେହିଭଳି ବିଦେଶୀ ମଦ ଦୋକାନ ଗୁଡିକରେ କୁଜଙ୍ଗ ବଜାର, ପାରାଦ୍ୱୀପ ଉଦୟବଟ,ପାରାଦ୍ୱୀପ ସହର, ପାରାଦ୍ୱୀପ ସେକ୍ଟର 21, ନାଉଗାଁ, ଜଗତସିଂହପୁର ଆଳି ପିଙ୍ଗଳ ଓ ଢ଼ିଅ ସାହିରେ ରହିଥିବା ନେଇ ଅବକାରୀ ବିଭାଗ ପକ୍ଷରୁ ସୂଚନା ମିଳିଛି ।
ସୂଚନାନୁସାରେ ଜିଲ୍ଲା ପ୍ରଶାସନ ପକ୍ଷରୁ ଏହି ନିଲାମ ପ୍ରକ୍ରିୟାରେ ଭାଗ ନେବାକୁ ଥିବା ବ୍ୟକ୍ତି ଏକଲକ୍ଷ ଟଙ୍କାର ଅମାନତ ରାଶି ଜମା କରି ନିଲାମ ପ୍ରକ୍ରିୟାରେ ଭାଗ ନେଇ ପାରିବେ ବୋଲି ଘୋଷଣା କରାଯାଇଥିଲା । ତେବେ ଏଥିରେ ଜିଲ୍ଲାରେ 7 ବିଦେଶୀ ଓ 2 ଦେଶୀ ମଦ ଦୋକାନ ପାଇଁ 580 ଜଣ ଆବେଦନ କରିଛନ୍ତି । ଆଉ ସେମାନଙ୍କ ମଧ୍ୟରୁ 9 ଜଣଙ୍କୁ ଲାଟେରୀ ମାଧ୍ୟମରେ ଚୟନ କରାଯାଇଥିବା ନେଇ ସୂଚନା ମିଳିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
