ଜଗତସିଂହପୁର: ବେକରେ ଲୁଗା ବାନ୍ଧି ମହିଳାଙ୍କ ଆତ୍ମହତ୍ୟା ! କୁଜଙ୍ଗ ଥାନା ଅନ୍ତର୍ଗତ ବାଲିତୁଠ ପଞ୍ଚାୟତର ବନାପାଟ ଗ୍ରାମରେ ବେକରେ ଲୁଗା ବାନ୍ଧି ମହିଳାଙ୍କ ଆତ୍ମହତ୍ୟା ସନ୍ଦେହ ଏବେ ଘେରରେ । ଝୁଲନ୍ତା ଅବସ୍ଥାରେ ମହିଳାଙ୍କ ମୃତଦେହ ଉଦ୍ଧାର କରାଯାଇ କୁଜଙ୍ଗ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯିବା ପରେ ଡାକ୍ତର ତାକୁ ମୃତ ଘୋଷଣା କରିଛନ୍ତି । ସୂଚନାନୁଯାୟୀ ବନାପଟ ଗ୍ରାମର ହଳଧର ସ୍ୱାଇଁ ତିନିବର୍ଷ ତଳେ ଗୁଆମୁଣ୍ଡା ଗ୍ରାମର ଟିକିନା ରାଉତଙ୍କୁ ବିବାହ କରିଥିଲେ । ତାଙ୍କର 1ବର୍ଷର ଏକ ଶିଶୁ କନ୍ୟା ଥିବା ନେଇ ସୂଚନା ମିଳିଛି ।
ମହିଳା ଜଣକ ଅସୁସ୍ଥତା ଥିବାନେଇ ଗ୍ରାମବାସୀ ମାନେ ମତ ପ୍ରକାଶ କରିଛନ୍ତି । ଶୁକ୍ରବାର ରାତିରେ ମହିଳା ଜଣକ ବେକରେ ଲୁଗାବାନ୍ଧି ଆତ୍ମହତ୍ୟା କରିଥିବା ବେଳେ ବର୍ତ୍ତମାନ ସୁଦ୍ଧା ମୃତ୍ୟୁର ପ୍ରକୃତ କାରଣ ଜଣାପଡିନାହିଁ । ମୃତ ଟିକିନାଙ୍କୁ ପରିବାର ଲୋକେ ଉଦ୍ଧାର କରି କୁଜଙ୍ଗ ମେଡିକାଲକୁ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।
ହେଲେ ସେପଟେ ଏହାକୁ ଅସ୍ବୀକାର କରିଛନ୍ତି ମୃତା ଟିକିନାଙ୍କ ଭାଇ । ଟିକିନାଙ୍କୁ ତାଙ୍କ ସ୍ୱାମୀ ମାରିଦେବା ପରେ ଆତ୍ମହତ୍ୟାର ରୂପ ଦେବାକୁ ଚେଷ୍ଟା କରୁଥିବା ନେଇ କୁଜଙ୍ଗ ଥାନାରେ ଝିଅର ପରିବାର ତରଫରୁ ଥାନାରେ ଅଭିଯୋଗ କରିଛନ୍ତି । ଏନେଇ ପୋଲିସ ଘଟଣାର ତଦନ୍ତ ଜାରି ରଖିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
