ପାରାଦ୍ବୀପ: ଜଗତସିଂହପୁର ଜିଲ୍ଲା ପାରାଦ୍ବୀପ ପୌରାଞ୍ଚଳରେ ଆବର୍ଜନା ପରିଚାଳନା କ୍ଷେତ୍ରରେ ସମସ୍ୟା ସୃଷ୍ଟି ହୋଇଛି । ଫଳରେ ଏହାର ସିଧାସଳଖ ପ୍ରଭାବ ବସ୍ତି ବାସିନ୍ଦାଙ୍କ ଉପରେ ପଡୁଛି । ସହର ଯାକର ଆବର୍ଜନା ଷଣ୍ଡକୁଦ ବସ୍ତି ନିକଟ ରାସ୍ତା କଡ଼ରେ ଗଦା କରି ଦିଆଯାଉଥିବାରୁ ଲୋକେ ସମସ୍ୟା ଭୋଗୁଥିବା ଦେଖିବାକୁ ମିଳିଛି । ଏଭଳି ଅସ୍ବାସ୍ଥ୍ୟକର ପରିସ୍ଥିତି ସୃଷ୍ଟି ହେବା ପରେ ପୌର ପ୍ରଶାସନ ଆବର୍ଜନା ପରିଚାଳନା କ୍ଷେତ୍ରରେ ଫେଲ୍ ମାରିଥିବା ଅଭିଯୋଗ ହୋଇଛି ।
ପାରାଦ୍ବୀପ ଭଳି ଏକ ଶିଳ୍ପ ସମୃଦ୍ଧ ସହରରେ ସ୍ଥାୟୀ ଆବର୍ଜନା ପରିଚାଳନା ପାଇଁ ଏକ ଡ଼ମ୍ପିୱାର୍ଡ ନଥିବାରୁ ପୌର ପରିଷଦ ପକ୍ଷରୁ ଷଣ୍ଡକୁଦ ବସ୍ତି ନିକଟ ପାରାଦ୍ବୀପରୁ ଏରସମାକୁ ସଂଯୋଗ କରୁଥିବା ରାସ୍ତାକଡ଼ରେ ଆବର୍ଜନା ଗୁଡିକୁ ପକାଇ ଦିଆଯାଉଛି । ଫଳରେ ଏଠାରେ ଥିବା ଝାଉଁ ଜଙ୍ଗଲ ସମେତ ନଦୀଜଳ ମଧ୍ୟ ପ୍ରଦୂଷିତ ହେଉଛି । ଖୋଲାଜାଗାରେ ଆବର୍ଜନା ପଡି ରହୁଥିବାରୁ ଦୁର୍ଗନ୍ଧମୟ ପରିବେଶ ସୃଷ୍ଟି ହେଉଛି ।
ଏ ସମ୍ପର୍କରେ ପାରାଦ୍ବୀପ ପୌରାଧ୍ୟକ୍ଷ ବସନ୍ତ କୁମାର ବିଶ୍ବାଳ କହିଛନ୍ତି ଯେ କୋରୋନା କାରଣରୁ କିଛି କାର୍ଯ୍ୟ ହୋଇପାରିନାହିଁ । ଖୁବଶୀଘ୍ର ଆବର୍ଜନା ପରିଚାଳନା ପାଇଁ ପଦକ୍ଷେପ ଗ୍ରହଣ କରାଯାଉଛି ।
ଇଟିଭି ଭାରତ, ଜଗତସିଂହପୁର
