କମିବାରେ ଲାଗିଛି ସିନେମା ହଲର ଚାହିଦା, ଜୀବିକା ହରାଉଛନ୍ତି ହଲ କର୍ମଚାରୀ

ଜଗତସିଂହପୁର ଜିଲ୍ଲାରେ ସିନେମା ହଲର ଡିମାଣ୍ଡ ଧିରେ ଧିରେ କମିବାରେ ଲାଗିଛି । ଡିଜିଟାଲ ମିଡିଆ ଓ ଟେଲିଭିଜନରେ ମନୋରଞ୍ଜନ ଚ୍ୟାନେଲ ଗୁଡ଼ିକ ଆସିବା ଓ ଦର୍ଶକଙ୍କୁ ଆକୃଷ୍ଟ କଲା ଭଳି ଚଳଚ୍ଚିତ୍ର ନଆସିବା ଫଳରେ ଦର୍ଶକ ଫିଲ୍ମ ହଲକୁ ଆସୁନାହାଁନ୍ତି ।

ଜଗତସିଂହପୁର: ଅତି ଦୟନୀୟ ଅବସ୍ଥାରେ ଚାଲିଛି ଜଗତସିଂହପୁର ଜିଲ୍ଲାର ସମସ୍ତ ସିନେମା ହଲ୍‌ । ଧିରେ ଧିରେ ଜିଲ୍ଲା ଚଳଚ୍ଚିତ୍ର ପ୍ରେକ୍ଷାଳୟର ଚାହିଦା କମିବାରେ ଲାଗିଲାଣି । ଏହାର ପ୍ରଭାବ ସିଧାସଳଖ ପ୍ରେକ୍ଷାଳୟ ମାଲିକଙ୍କ ଠାରୁ ଆରମ୍ଭ କରି ତଳସ୍ତରରେ ଥିବା କର୍ମଚାରୀଙ୍କ ଉପରେ ପଡୁଛି । ନିଜ ରୋଜଗାର ହରାଇ ବସିଲେଣି ପ୍ରେକ୍ଷାଳୟ କର୍ମଚାରୀ ।

ସୂଚନା ଅନୁସାରେ ଜଗତସିଂହପୁର ଜିଲ୍ଲାରେ 2015 ସୁଦ୍ଧା 10 ଟି ଫିଲ୍ମ ହଲ ଥିବାବେଳେ ଏବେ ମାତ୍ର 4ଟି ହଲ ଚାଲୁଛି। ଏହା ପୁଣି ଅତି ଦୟନୀୟ ଅବସ୍ଥାରେ ଚାଲୁଥିବା କହିଛନ୍ତି ହଲ ମାଲିକ । ଆଗଭଳି ପ୍ରେକ୍ଷାଳୟ ଗୁଡିକୁ ଦର୍ଶକ ଆସୁନଥିବାରୁ ଧୀରେ ଧୀରେ କେତେକ ଫିଲ୍ମ ହଲ ମଧ୍ୟ ବନ୍ଦ ହୋଇଗଲାଣି।

ଡିଜିଟାଲ ମିଡିଆ ଓ ଟେଲିଭିଜନରେ ମନୋରଞ୍ଜନ ଚ୍ୟାନେଲ ଗୁଡ଼ିକ ଆସିବା ଓ ଦର୍ଶକଙ୍କୁ ଆକୃଷ୍ଟ କଲା ଭଳି ଚଳଚ୍ଚିତ୍ର ନଆସିବା ଫଳରେ ଦର୍ଶକ ଫିଲ୍ମ ହଲକୁ ଆସୁନଥିବା କହିଛନ୍ତି କେତେକ ହଲ ମାଲିକ । ଦର୍ଶକ ନଥିବାରୁ ଦିନକୁ 4ଟି ସୋ ବଦଳରେ ଏବେ ଗୋଟିଏ ସୋ ହେଉଥିବା ଦେଖିବାକୁ ମିଳୁଛି । ଯାହା ଫଳରେ କର୍ମଚାରୀଙ୍କୁ ଜୀବିକା ହରାଇବାକୁ ପଡ଼ୁଛି । ଯେଉଁଠି 25 ରୁ30 ଜଣ ନିୟୋଜିତ ଥିଲେ ସେଠି ମାଲିକ ମାନେ 2 ରୁ 3ଜଣ କର୍ମଚାରୀ ରଖି କାମ ଚଳାଉଛନ୍ତି।

ହଲ ମାଲିକଙ୍କ କହିବା କଥା ମାସକୁ ବିଦ୍ୟୁତ ବିଲ ସାଙ୍ଗକୁ କର୍ମଚାରୀଙ୍କ ଦରମା ଓ ଆନୁସଙ୍ଗିକ ଖର୍ଚ୍ଚ ବହନ କରିବା କଷ୍ଟକର ହୋଇପଡ଼ୁଛି। ସରକାର ଚଳଚ୍ଚିତ୍ର ଶିଳ୍ପ ଉପରୁ ଟିକସ ଛାଡ଼ କରିଥିଲେ । କିନ୍ତୁ GST ଆଇନ ଆସିବା ଫଳରେ ଟିକେଟର ମୂଲ୍ୟ ବୃଦ୍ଧି ପାଇଛି । ମୂଲ୍ୟ ବୃଦ୍ଧି ଫଳରେ ନିମ୍ନ ଓ ମଧ୍ୟବିତ ପରିବାର ମୁଁହ ଫେରାଇ ନେଉଥିବା ଦେଖିବାକୁ ମିଳୁଛି।

ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ