ଜଗତସିଂହପୁର: ଜଗତସିଂହପୁର ଜିଲ୍ଲା ତିର୍ତ୍ତୋଲ ଥାନା ଅଞ୍ଚଳରେ ଜଣେ ନାବାଳିକାକୁ ଅପହରଣ କରାଯାଇଥିବା ଅଭିଯୋଗ କରି ସଂପୃକ୍ତ ନାବାଳିକାର ମା, ତିର୍ତ୍ତୋଲ ଥାନାରେ ଅଭିଯୋଗ କରିଛନ୍ତି । ସୂଚନା ଅନୁସାରେ ତିର୍ତ୍ତୋଲ ଥାନା ଅନ୍ତର୍ଗତ କୃଷ୍ନା ନନ୍ଦପୁର ପଞ୍ଚାୟତ ନୂଆଗାଁ ଅଞ୍ଚଳର ପ୍ରଭାକର ଭୁଇଁଆଙ୍କ ବଡ଼ ଝିଅ ଶୁଭଶ୍ରୀ (15)ଙ୍କ ସେହି ଗ୍ରାମର ଜଣେ ଯୁବକଙ୍କ ସହ ପ୍ରେମ ସମ୍ପର୍କ ଥିଲା । ତେବେ ହଠାତ ଗତ ଡିସେମ୍ବର 20 ତାରିଖରେ ନାବାଳିକାଟି କେଉଁଆଡ଼େ ନିଖୋଜ ହୋଇଯାଇଥିଲେ । ପରିବାର ଲୋକେ ପ୍ରଥମେ ଖୋଜାଖୋଜି କରିଥିଲେ ମଧ୍ୟ ନାବାଳିକାଟିର ପତ୍ତା ମିଳିନଥିଲା ।
ପରେ ପରିବାର ଲୋକେ ତିର୍ତ୍ତୋଲ ଥାନାରେ ଏତଲା ଦେଇଥିଲେ । କିନ୍ତୁ ପୋଲିସ ନାବାଳିକାକୁ ଖୋଜିବାରେ ବିଫଳ ହୋଇଥିଲା । ନାବାଳିକାର ମା, ଏସମ୍ପର୍କରେ ଜଗତସିଂହପୁର ଏସପିଙ୍କୁ ଜଣାଇଥିଲେ । ଏସ.ପି ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ । କିନ୍ତୁ ଦୀର୍ଘ ଦିନ ଧରି ନାଁ ବାଳିକାଟିର ପତ୍ତା ମିଳୁ ନଥିବାରୁ ପରିବାର ଲୋକେ ଏବେ ଆତଙ୍କିତ ହୋଇ ପଡିଛନ୍ତି । ନାବାଳିକାକୁ ଅପହରଣ କରାଯାଇ ତାଙ୍କୁ ବାହାରକୁ ଚାଲାଣ କରାଯାଇ ଥିବା ସନ୍ଦେହ କରୁଛନ୍ତି ପରିବାର ଲୋକେ । ଏସମ୍ପର୍କରେ ପୋଲିସର ମତାମତ ନେବାକୁ ଚେଷ୍ଟା କରାଯାଇଥିଲେ ମଧ୍ୟ ଯୋଗାଯୋଗ ସମ୍ଭବ ହୋଇ ପାରିନାହିଁ ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
