ଜଗତସିଂହପୁର: ସହରରେ ମାସ୍କ ଚେକିଂ ଜୋରଦାର । ଘରୁ ପଦାକୁ ବାହାରିଲେ ମାସ୍କ ବ୍ୟବହାର କରିବା ବାଧ୍ୟତାମୂଳକ । ଶୁକ୍ରବାର ଜଗତସିଂହପୁରରେ ଅମାନିଆ ଲୋକ ମାସ୍କ ବ୍ୟବହାର କରି ନ ଥିବାରୁ ପୋଲିସ ଜୋରିମାନା ଆଦାୟ କରିବା ସହ ଥାନାକୁ ନେଇଛି ।
କୋରୋନା ଭୂତାଣୁ ଦ୍ରୁତ ସଂକ୍ରମଣ ରୋକିବା ପାଇଁ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ମାସ୍କ ପିନ୍ଧିବାକୁ ବାଧ୍ୟତାମୂଳକ ଘୋଷଣା କରିଛନ୍ତି । ସାରା ରାଜ୍ୟରେ 9 ତାରିଖରୁ ମାସ୍କ ବ୍ୟବହାର ବାଧ୍ୟତାମୂଳକ ଲାଗୁ ହୋଇଥିଲାବେଳେ ଜଗତସିଂହପୁର ପୋଲିସ ଆକ୍ସନ ମୋଡ଼କୁ ଆସିଛି । ସହରର ଥାନ ଛକ ,ଗାନ୍ଧୀ ଛକ ଠାରୁ ଆରମ୍ଭ କରି ବିଭିନ୍ନ ସ୍ଥାନରେ ମାସ୍କ ଚେକିଂ ଜୋରଦାର କରିଛି । ଯଦି ଆପଣଙ୍କ ପାଖରେ ମାସ୍କ ନାହିଁ ତେବେ ରୁମାଲ କିମ୍ବା ଗାମୁଛାରେ ମୁହଁ ଘୋଡାଇ ରଖିବାକୁ ନିର୍ଦ୍ଦେଶ ଦିଆଯାଇଛି । ସେହିପରି ମହିଳା ମାନେ ଲୁଗା କାନି କିମ୍ବା ଓଢଣୀ ମଧ୍ୟ ବ୍ୟବହାର କରି ପାରିବେ ।
ଜିଲ୍ଲା ପ୍ରଶାସନ ପକ୍ଷରୁ ବାରମ୍ବାର ସଚେତନ କରାଯାଉଥିଲେ ବି କେତେକ ଅମାନିଆ ଲୋକେ ଏହାକୁ ମାନୁ ନଥିବାରୁ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ କହିଛି।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର,ଇଟିଭି ଭାରତ
