ଜଗତସିଂହପୁର: ଜିଲ୍ଲାର ବିଭିନ୍ନ ବ୍ଲକର ଧାନ କ୍ଷେତରେ ଜଉ ଓ ସହାରା ରୋଗ ବ୍ୟାପିବାରେ ଲାଗିଛି । ଏହାକୁ ନେଇ ଆତଙ୍କିତ ଚାଷୀକୂଳ। ବିଲରେ ପାଚିଲା ଧାନର ସମ୍ଭାର ଦେଖି ଚାଷୀ ମୁଁହରେ ହସ ଫୁଟି ଉଠିଥିଲା କିନ୍ତୁ ଏବେ ଧାନ କ୍ଷେତ ଦେଖିଲେ ଚାଷୀ ମୁଣ୍ଡରେ ଚଡକ ପଡିଯାଉଛି ।
ମୁଣ୍ଡରେ ହାତ ଦେଇ ବସିଛି ଚାଷୀ । ଧାନ ପାଚି ଅମଳ ସମୟ ବେଳକୁ ଧାନ ବିଲରେ ମାଡୁଛନ୍ତି ଜଉ ପୋକ ବା ସହାରା ପୋକ । ଏହି ପୋକ ଆକ୍ରମଣ କଲେ ଧାନକେଣ୍ଡା ଗୁଡିକରେ କଳା ଫିମ୍ପି ମାଡିଯାଉଛି ଓ ଧାନ କେଣ୍ଡା ନଷ୍ଟ ହେଉଛି । ଏମିତିକି ଧାନଗଛ ଗୁଡିକ ଝାଉଁଳିବା ସହ ମରିଯାଉଛି ।
ଜିଲ୍ଲାର ବିରିଡି, ଜଗତସିଂହପୁର, ରଘୁନାଥପୁର, ତିର୍ତୋଲ ବ୍ଲକର ଶହ ଶହ ହେକ୍ଟର ଧାନ କ୍ଷେତ ଏହି ରୋଗରେ ପ୍ରଭାବିତ ହୋଇଛି । ଏ ସମ୍ପର୍କରେ ଜିଲ୍ଲା କୃଷି ଅଧିକାରୀ ରବିନାରାୟଣ ମହାପାତ୍ରଙ୍କୁ ପଚାରିବାରୁ ସେ କହିଛନ୍ତି, ଏହିରୋଗ କିଛି ବ୍ଲକରେ ଦେଖିବାକୁ ମିଳିଛି । ଏହାର ପ୍ରତିକାର ପାଇଁ କୃଷି ବିଭାଗ ପଦକ୍ଷେପ ନେଉଥିବା କହିଛନ୍ତି ଅଧିକାରୀ । ତେବେ ଚାଷୀ ମାନଙ୍କ ସମସ୍ୟା ନେଇ ଜିଲ୍ଲା ପ୍ରଶାସନ ଓ କୃଷି ବିଭାଗ ପଦକ୍ଷେପ ଗ୍ରହଣ କରିବା ଜରୁରୀ ହୋଇପଡିଛି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
