ଜଗତସିଂହପୁର: ଜିଲ୍ଲାରେ ପ୍ରସ୍ତାବିତ ଜିନ୍ଦଲ ପ୍ରକଳ୍ପ କାର୍ଯ୍ୟକାରୀ କରିବାକୁ ନେଇ ଆଲୋଚନା ବୈଠକ କରିଥିଲା ଜଗତସିଂହପୁର ପ୍ରଶାସନ । କୁଜଙ୍ଗ ଓ ନୂଆଗାଁ ପଞ୍ଚାୟତରେ ମିଶ୍ରିତ ଭାବେ ଆଲୋଚନା କରାଯାଇଥିଲା । ଏହି କ୍ରମରେ ଆଜି ଢ଼ିଙ୍କିଆ ପଞ୍ଚାୟତ ଅଫିସରେ ପୁଣି ଆଲୋଚନା ଶିବିର ଅନୁଷ୍ଠିତ ହେବାକୁ ଥିଲା । ମାତ୍ର ବୈଠକ ପୂର୍ବରୁ ପ୍ରକଳ୍ପ ବିରୋଧରେ ରାସ୍ତାକୁ ଓହ୍ଲାଇଛନ୍ତି ପଞ୍ଚାୟତବାସୀ । ଢ଼ିଙ୍କିଆ ଅଞ୍ଚଳର ଶତାଧିକ ଗ୍ରାମବାସୀ ଆଜି ଗ୍ରାମର ଫୁଲଖାଇ ମନ୍ଦିର ନିକଟରୁ ଶୋଭାଯାତ୍ରାରେ ବାହାରି ପଞ୍ଚାୟତ ଅଫିସରେ ପହଞ୍ଚିଛନ୍ତି । ଗ୍ରାମବାସୀଙ୍କ ନାରାବାଜିରେ ସମଗ୍ର ଅଞ୍ଚଳ ଫାଟି ପଡିଛି ।
ସୂଚନାଯୋଗ୍ୟ, ଢ଼ିଙ୍କିଆ ପଞ୍ଚାୟତ ଅଫିସ ପରିସରରେ JSW ପ୍ରକଳ୍ପକୁ ନେଇ ଆଜି ଆଲୋଚନା ବୈଠକ ବସିବ । ଏହି ବୈଠକରେ ଜଗତସିଂହପୁର ଜିଲ୍ଲାପାଳ ପାରୁଲ ପଟୱାରୀ, ଏସପି, ଅଖିଳେଶ୍ବର ସିଂ, ମନ୍ତ୍ରୀ ରଘୁନନ୍ଦନ ଦାସଙ୍କ ସହିତ ଏରସମା ବ୍ଲକ ଅଧିକାରୀ ଓ ଜିନ୍ଦଲ ଅଧିକାରୀମାନେ ସାମିଲ ହେବେ ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
