ଜଗତସିଂହପୁର: ଜିଲ୍ଲାର ପାରାଦ୍ବୀପ ପିପିଏଲ୍ ଛକ ନିକଟରେ ଥିବା ମାର୍କେଟରେ ଭୟାବହ ଅଗ୍ନିକାଣ୍ଡ । ଗତକାଲି ରାତିରେ ଅଗ୍ନିକାଣ୍ଡ ଘଟି ଜଳିଯାଇଛି ଲକ୍ଷାଧିକ ଟଙ୍କାର ସମ୍ପତ୍ତି । ନିଆଁ ଲାଗିବାର କାରଣ ଜଣାପଡିନାହିିଁ ।
ସୂଚନାନୁସାରେ, ରବିବାର ରାତିରେ ପିପିଏଲ ଛକରେ ଥିବା ମାର୍କେଟରେ ଗୋଟିଏ ଚପଲ ଦୋକାନ,ପାନ କେବିନ ସହିତ ଦୁଇଟି ପରିବା ଦୋକାନ ଓ ଫର୍ନିଚର ଦୋକାନରେ ଭୟାବହ ଅଗ୍ନିକାଣ୍ଡ ହୋଇଛି । ଫଳରେ ନିଆଁ ଚାରିଆଡକୁ ବ୍ୟାପି ଯାଇଥିଲା । ଫର୍ନିଚର ଦୋକାନରେ ଥିବା କାଠରେ ନିଆଁ ଲାଗିବାରୁ ନିଆଁର ପ୍ରକୋପ ଏତେ ବଢିଥିଲା ନିଆଁକୁ ଆୟତ କରିବା ସମ୍ଭବ ହୋଇପାରିନଥିଲା । ଫଳରେ ଲକ୍ଷାଧିକ ଟଙ୍କାର ସରଞ୍ଜାମ ପୋଡି ପାଉଁଶ ହୋଇଯାଇଥିଲା । ଏହା ସହିତ ସେଠାରେ ଥିବା ଗୋଟିଏ ଟ୍ରକ ଚକାରେ ମଧ୍ୟ ନିଆଁ ଲାଗିଯାଇଥିଲା । ନିଆଁକୁ ଆୟତ କରିବାକୁ ଲୋକମାନେ ଅଗ୍ନିଶମ ବିଭାଗକୁ ଖବର ଦେଇଥିଲେ ।
ଘଟଣାସ୍ଥଳରେ କୁଜଙ୍ଗ ଅଗ୍ନିଶମ ବିଭାଗ ଓ ପି.ପି.ଏଲ ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ କରିଛି । ତେବେ ଏହି ଅଗ୍ନିକାଣ୍ତର କାରଣ ଜଣାପଡିନାହିଁ ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର,ଇଟିଭି ଭାରତ
