ଜଗତସିଂହପୁର: ଜିଲ୍ଲା ସଦର ମହକୁମାରେ ଟ୍ରାଫିକ ସମସ୍ୟାକୁ ନେଇ ଚିନ୍ତାରେ ଥିଲେ ସହରବାସୀ । ହେଲେ ଏନେଇ ଇଟିଭି ଭାରତରେ ପ୍ରଥମେ ଖବର ପ୍ରସାରଣ ହେବା ପରେ ଜିଲ୍ଲା ପ୍ରଶାସନ ପକ୍ଷରୁ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ସୂଚନାଯୋଗ୍ୟ, ବର୍ଷ ବର୍ଷ ଧରି ଆଳିପିଙ୍ଗଳ ବାଲିଘାଟରୁ ବାଲି ଉଠାଣ କରି ଭାରିଯାନ ଗୁଡିକ ବ୍ଲକ ଛକ୍, ସହର ଭିତର ଜିଲ୍ଲାପାଳଙ୍କ ଅଫିସ ଦେଇ ପାରାଦୀପ, ନାଉଗାଁ, କଟକ ଆଦି ବିଭିନ୍ନ ସ୍ଥାନକୁ ଯାଉଥିଲା । ସେହିପରି ଜିଲ୍ଲାର ସୋମନାଥ ହାଟକୁ ପ୍ରତ୍ୟେକ ଦିନ ଶହଶହ ସଂଖ୍ୟାର ଆଳୁଟ୍ରକ୍ ପଶ୍ଚିମବଙ୍ଗରୁ ଏବଂ ବିଭିନ୍ନ ଅଞ୍ଚଳରୁ ମାଲବାହୀ ଗାଡି ଯାତାୟତ କରୁଥିଲା । ଯଦ୍ବାରା ସହରରେ ବିଭିନ୍ନ ସମୟରେ ଦୁର୍ଘଟଣା ଘଟି ବହୁ ଲୋକଙ୍କ ମୃତ୍ୟୁ ଘଟୁଥିଲା ।
ସହରର ଏହି ମୁଖ୍ୟ ସମସ୍ୟା ସମ୍ପର୍କରେ ଗତ ୩୦ ତାରିଖରେ ଇଟିଭି ଭାରତରେ ଖବର ପ୍ରସାରଣ ହୋଇଥିଲା । ଏହା ପରେ ପ୍ରଶାସନ ପକ୍ଷରୁ ସହରର ମଧ୍ୟରେ ଭାରିଯାନ ଚଳାଚଳ ଉପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । ସହରର ପ୍ରବେଶ ପଥରେ ସୂଚନାଫଳକ ଲଗାଇବା ସହ ସକାଳ ୮ଟା ରୁ ଦିନ ୧୧ଟା ଏବଂ ଅପରାହ୍ନ ୩ଟାରୁ ରାତି ୮ ଟା ପର୍ଯ୍ୟନ୍ତ ସହର ମଧ୍ୟକୁ ଭାରିଯାନ ପ୍ରବେଶ ଉପରେ କଡା କଟକଣା ଜାରି କରାଯାଇଛି ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
