ଜଗତସିଂହପୁର: ଜିଲ୍ଲାରେ ଚଳିତ ବର୍ଷ କୋଭିଡ କଟକଣାରେ ଦୁର୍ଗା ପୂଜା ପାଳନ କରାଯିବାକୁ ନିଷ୍ପତ୍ତି ହୋଇଛି । ମଙ୍ଗଳବାର ଏସମ୍ପର୍କରେ ଜିଲ୍ଲା ପ୍ରଶାସନ ପକ୍ଷରୁ ଏକ ବୈଠକ, ଜିଲ୍ଲାପାଳଙ୍କ ସଦଦ୍ଭାବନା ସଭାଗୃହରେ ଅନୁଷ୍ଠିତ ହୋଇଥିଲା । ଏଥିରେ ଜଗତସିଂହପୁର ସହରର ସମସ୍ତ ପୂଜା ମଣ୍ଡପର କର୍ମକର୍ତ୍ତା ଉପସ୍ଥିତ ରହି ଚଳିତ ବର୍ଷ ପୂଜାକୁ କିପରି ଶୃଙ୍ଖଳିତ କରାଯାଇ ପାରିବ ସେ ନେଇ ଆଲୋଚନା ହୋଇଥିଲା । ପ୍ରଶାସନର ନିଷ୍ପତ୍ତି ଅନୁସାରେ ପ୍ରତ୍ୟେକ ପୂଜା ମଣ୍ଡପରେ ମୁଣ୍ମୟୀ ମୂର୍ତ୍ତିର ଉଚ୍ଚତା ୪ ଫୁଟରୁ କମ ରଖିବା ସହିତ ପୂଜା ମଣ୍ଡପର ତିନିପାଖ ବନ୍ଦ ରହିବ।
ସେହିପରି ପୂଜା ମଣ୍ଡପରେ ଡାକବାଜି ଯନ୍ତ୍ର ବ୍ୟବହାର ଉପରେ ସମ୍ପୂର୍ଣ୍ଣ ନିଷିଦ୍ଧ କରାଯାଇଥିବା ବେଳେ ପୂଜା ମଣ୍ଡପରେ ପୂଜକଙ୍କ ସମେତ 7ଜଣ ରହି ପୂଜା କରିବାକୁ କୁହାଯାଇଛି । ଅକ୍ଟୋବର 16 ତାରିଖ ଶନିବାର ଦିନ ସମସ୍ତ ପୂଜା କମିଟି ସହରରେ ହୋଇଥିବା ୪ଟି ଅସ୍ଥାୟୀ ପୋଖରୀରେ ଦିନ ୧୨ ଟା ଠାରୁ ଅପରାହ୍ନ ୪ଟା ମଧ୍ୟରେ ନିରାଡମ୍ବର ଭାବେ ବିସର୍ଜନ କରିବାକୁ ନିଷ୍ପତ୍ତି ନିଆଯାଇଛି । ଯାହାକୁ ନେଇ ବିଭିନ୍ନ ପୂଜା କମିଟି ଅସନ୍ତୋଷ ବ୍ୟକ୍ତ କରିବା ସହ ଜିଲ୍ଲା ପ୍ରଶାସନ ନିଜ ନିଷ୍ପତ୍ତି ପୁନଃବିଚାର କରୁ ବୋଲି ଦାବି କରିଛନ୍ତି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
