29ରେ ଜଗତସିଂହପୁର ପୌରପରିଷଦ ଉପନିର୍ବାଚନ, ପ୍ରଚାର ମୈଦାନରେ ହେଭିୱେଟ୍

ଜଗତସିଂହପୁର ପୌରପରିଷଦର 6 ନମ୍ବର ୱାର୍ଡ ପାଇଁ ପଡିବ ଭୋଟ । ଆସନ୍ତା 29 ତାରିଖରେ ଉପନିର୍ବାଚନ ହେବାକୁ ଥିବାବେଳେ ଜୋରଦାର ପ୍ରଚାର କରିଛନ୍ତି ବିଜେଡି ଓ କଂଗ୍ରେସ । ଅଧିକ ପଢନ୍ତୁ

ଜଗତସିଂହପୁର: ପୌରପରିଷଦର 6 ନମ୍ବର ୱାର୍ଡ ପାଇଁ ପଡିବ ଭୋଟ । ଆସନ୍ତା 29 ତାରିଖରେ 6 ନମ୍ବର ୱାର୍ଡରେ ଉପନିର୍ବାଚନ ହେବାକୁ ଯାଉଛି । ଯାହାକୁ ନେଇ ଶାସକ ବିଜେଡି ସହ ବିରୋଧୀ ବିଜେପି ଓ କଂଗ୍ରେସ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିବ । ସୂଚନା ଅନୁସାରେ, ଗତ ପୌର ନିର୍ବାଚନ ସମୟରେ ବିଜୁ ଜନତା ଦଳ ପ୍ରାର୍ଥୀ ସୌଭାଗ୍ୟ ଲକ୍ଷ୍ମୀ ରଥ ଏହି 6 ନମ୍ବର ୱାର୍ଡରେ ବିଜୟୀ ହୋଇଥିଲେ । ସେ ବର୍ଷେରୁ ଅଧିକ ଦିନ କାଉନସିଲର ରହିଥିବାବେଳେ ଗତ ମାସରେ ତାଙ୍କର ପରଲୋକ ହୋଇଯାଇଥିଲା ।

ସୌଭାଗ୍ୟ ଲକ୍ଷ୍ମୀଙ୍କ ପରଲୋକ ହେବାପରେ ଏହି ପଦବୀଟି ଖାଲି ପଡିଥିଲା । ଜିଲ୍ଲା ନିର୍ବାଚନ ଅଧିକାରୀ ତଥା ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଆସନ୍ତା 29 ତାରିଖରେ ଏହି ୱାର୍ଡ ପାଇଁ ଭୋଟ ଗ୍ରହଣ କରାଯିବ । ଏହାକୁ ନେଇ ରାଜନୈତିକ ମହଲରେ ତତ୍ପରତା ଦେଖିବାକୁ ମିଳିଛି। ବିଜେଡି ପ୍ରାର୍ଥୀ ଭାବେ ରୋଜଲିନ ଦାଶଙ୍କୁ ଦଳ ଟିକେଟ ଦେଇଥିବାବେଳେ କଂଗ୍ରେସ ଚିନ୍ମୟୀ ନନ୍ଦଙ୍କୁ ପ୍ରାର୍ଥୀ କରିଛି । ବିଜେଡି ପ୍ରାର୍ଥୀ ରୋଜଲିନଙ୍କ ପାଇଁ ଜଗତସିଂହପୁର ବିଧାୟକ ପ୍ରଶାନ୍ତ କୁମାର ମୁଦୁଲି ପ୍ରଚାରର ମଙ୍ଗ ଧରିଥିବା ଦେଖିବାକୁ ମିଳିଛି ।

ଗୁରୁତ୍ବପୂର୍ଣ୍ଣ କଥା ହେଉଛି, କଂଗ୍ରେସ ପ୍ରାର୍ଥୀ ପାଇଁ କଂଗ୍ରେସରୁ ନିଲମ୍ବିତ ହୋଇଥିବା ବରିଷ୍ଠ ନେତା ତଥା ପୂର୍ବତନ ବିଧାୟକ ଚିରଞ୍ଜୀବ ବିଶ୍ୱାଳ ପ୍ରଚାରକୁ ଜୋରଦାର କରିଛନ୍ତି । ବିଜେପି ପକ୍ଷରୁ ପ୍ରଚାର ପ୍ରସାର ସେତେ ଆଖି ଦୃଶିଆ ହୋଇ ନଥିବା ଦେଖିବାକୁ ମିଳିଛି। ଏହି ୱାର୍ଡରେ ଭୋଟରଙ୍କ ସଂଖ୍ୟା 11 ଶହ ଥିବାବେଳେ ବିଜେଡି ଓ କଂଗ୍ରେସ ମଧ୍ୟରେ ଜୋରଦାର ଲଢେଇ ହେବାକୁ ଯାଉଛି । କଂଗ୍ରେସ ପ୍ରାର୍ଥୀଙ୍କ ପାଇଁ ଜଗତସିଂହପୁର ପୌରାଧ୍ୟକ୍ଷା ଅର୍ଚ୍ଚନା ସିଂ ମଧ୍ୟ ବୁଲିବୁଲି ପ୍ରଚାର କରୁଥିବା ଦେଖିବାକୁ ମିଳିଛି । ଏହି ୱାର୍ଡ ପାଇଁ ଦୁଇ ହେବିୱେଟ୍ ନେତା ଚିରଞ୍ଜୀବ ବିଶ୍ୱାଳ ଓ ବିଧାୟକ ପ୍ରଶାନ୍ତ ମୁଦୁଲି ପ୍ରଚାରକୁ ଜୋରଦାର କରିଛନ୍ତି । ଆଉ ୩ ଦିନ ପରେ ପୌର ପରିଷଦର 6 ନମ୍ବର ୱାର୍ଡ ପାଇଁ ପଡିବ ଭୋଟ । ତେବେ ଏହି ଉପନିର୍ବାଚନରେ କିଏ ବାଜିମାତ କରୁଛି ତାହା ଉପରେ ସମସ୍ତଙ୍କ ନଜର ରହିଛି ।

ଇଟିଭି ଭାରତ, ଜଗତସିଂହପୁର