ଜଗତସିଂହପୁର : ସଦର ମହକୁମାର ଯୋଗଧାରୀ ଛକରେ ମର୍ମନ୍ତୁଦ ସଡ଼କ ଦୁର୍ଘଟଣା। ଏକ ଘରୋଇ ବସ ଧକ୍କାରେ ଜଣେ ୩୦ ବର୍ଷୀୟ ଯୁବକଙ୍କ ମୃତ ହୋଇଛି। ମୃତକ ଜଣକ ହେଉଛନ୍ତି କାକଟପୁର ନଗର ଅଞ୍ଚଳର ଦେବ ବରାଳ। ସୂଚନା ମୁତାବକ ଦେବ ବରାଳ ଆଜି( ଶୁକ୍ରବାର) ସକାଳ ସାଢେ଼ ୬ଟା ସମୟରେ ଚାଲିଚାଲି ରାସ୍ତାର ଅପର ପାର୍ଶ୍ଵକୁ ଯାଉଥିବା ସମୟରେ ଯାତ୍ରୀବାହୀ ବସ ଦ୍ରୁତ ଗତିରେ ଆସି ତାଙ୍କୁ ଧକ୍କା ଦେଇଚାଲି ଯାଇଥିଲା। ସ୍ଥାନୀୟ ଲୋକଙ୍କ ସହାୟତାରେ ଦେବ ବରାଳଙ୍କୁ ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ଡାକ୍ତର ସେଠାରେ ମୃତ ଘୋଷଣା କରିଥିଲେ।
ପରେ ଉତ୍ୟକ୍ତ ଲୋକମାନେ ଜଗତସିଂହପୁର-ମାଛଗାଁ ରାସ୍ତାକୁ ଅବରୋଧ କରିଥିଲେ। ପରବର୍ତ୍ତୀ ସମୟରେ ଜଗତସିଂହପୁର ଥାନା ଅଧିକାରୀ ଘଟଣା ସ୍ଥଳରେ ପହଞ୍ଚି ଉତ୍ୟକ୍ତ ଲୋକମାନଙ୍କୁ ବୁଝାଇ ରାସ୍ତା ଅବରୋଧ ହଟାଇ ଥିବା ଜଣାପଡିଛି। ଅପର ପକ୍ଷରେ ଦୁର୍ଘଟଣା ଘଟାଇଥିବା ଯାତ୍ରୀବାହୀ ବସ ଟି ଜଗତସିଂହପୁର ଥାନାରେ ଅଟକ ରହିଥିବା ଜଣାପଡ଼ିଛି।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
