ଜଗତସିଂହପୁର: ଜିଲ୍ଲାରେ ବିଜେଡି ଦୁଇ ଫାଳ । ଜଗତସଂହପୁର ଜିଲ୍ଲା ବିଜେଡି ଜନସମ୍ପର୍କ ପଦଯାତ୍ରାରେ ଏହା ଦେଖିବାକୁ ମିଳିଛି । ଜିଲ୍ଲାପାଳଙ୍କ କାର୍ଯ୍ୟାଳୟ ପଡ଼ିଆରେ ଅନୁଷ୍ଠିତ ଜିଲ୍ଲା ବିଜେଡ଼ିର ଜନସମ୍ପର୍କ ପଦଯାତ୍ରା ବୈଠକରେ ଦେଖିବାକୁ ମିଳିନଥିଲା ଜିଲ୍ଲାର ପୁରୁଣା ଓ ପୁରୁଖା ମୁଖିଆଙ୍କୁ ।
ଖବର ଅନୁଯାୟୀ, ଆୟୋଜିତ ବୈଠକରେ ଜଳ ସମ୍ପଦ ଓ ସୂଚନା ଓ ଲୋକସମ୍ପର୍କ ବିଭାଗ ମନ୍ତ୍ରୀ ରଘୁନନ୍ଦନ ଦାସ ,ସାଂସଦ ରାଜଶ୍ରୀ ମଲ୍ଲିକ, ଜିଲ୍ଲା ବିଜେଡି ସଭାପତି ଅମରେନ୍ଦ୍ର ଦାସ ପାରାଦ୍ବୀପ ବିଧାୟକ ସମ୍ବିତ ରାଉତରାୟ ଯୋଗ ଦେଇଥିଲେ ।
କିନ୍ତୁ ଏହି ଉତ୍ସବରେ ବିଜେଡିର ବରିଷ୍ଠ ନେତା ତଥା ତିର୍ତ୍ତୋଲ ବିଧାୟକ ଵିଷ୍ଣୁ ଦାସ, ଜଗତସିଂହପୁର ବିଧାୟକ ପ୍ରଶାନ୍ତ ମୁଦୁଲି ଓ ଜିଲ୍ଲା ପରିଷଦ ଅଧକ୍ଷା ପ୍ରିୟଦର୍ଶିନୀ ବିଶ୍ବାଳ ଯୋଗ ନଦେବା ଘଟଣାକୁ ନେଇ ଚର୍ଚ୍ଚା ଜୋର ଧରିଛି ।
ଜିଲ୍ଲା ସଭାପତି ଅମରେନ୍ଦ୍ର ଦାସଙ୍କ ସହ ଜଗତସିଂହପୁର ବିଧାୟକ ପ୍ରଶାନ୍ତ ମୁଦୁଲିଙ୍କ ସହ ସମ୍ପର୍କ ଭଲ ନଥିବା କୁହାଯାଉଥିବା ବେଳେ ସାଂସଦ ରାଜଶ୍ରୀ ମଲ୍ଲିକ ଓ ତିର୍ତ୍ତୋଲ ବିଧାୟକ ଵିଷ୍ଣୁ ଦାସଙ୍କ ମଧ୍ୟରେ ବିବାଦ ବେଶ ପୁରୁଣା । ଆଜି ମଧ୍ୟ ଜନସମ୍ପର୍କ ପଦଯାତ୍ରାରେ ନାଁ ନନେଇ ଜିଲ୍ଲା ପରିଷଦ ଉପାଧ୍ୟକ୍ଷ ଲିଙ୍ଗରାଜ ସାହୁ ଵିଷ୍ଣୁ ଦାସଙ୍କ ଉପରେ ବର୍ଷି ଥିଲେ । ମୋଟାମୋଟି ଭାବେ ଦେଖିବାକୁ ଗଲେ ଜନସମ୍ପର୍କ ପଦଯାତ୍ରାରେ ବିଜେଡ଼ିର ଆଭ୍ୟନ୍ତରୀଣ ଗୋଷ୍ଠି କନ୍ଦଳ ଜଳଜଳ ହୋଇ ଦେଖିବାକୁ ମିଳିଥିଲା ।
ଜଗତସିଂହପୁରରୁ ସୁଶାନ୍ତ ପାତ୍ର, ଇଟିଭି ଭାରତ
