ପାରାଦୀପ: ନକଲି କୋଭିଡ ଓ ସ୍ୱାସ୍ଥ୍ୟଗତ ପ୍ରମାଣ ପତ୍ର ପ୍ରସ୍ତୁତ କରୁଥିବା ଦୁଇ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ମଙ୍ଗଳବାର ପାରାଦୀପ ଆଦର୍ଶ ଥାନା ପୋଲିସ ଦୁଇଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି । ଅଭୟଚାନ୍ଦ ଥାନା ଅନ୍ତର୍ଗତ ବଗଦିଆ ନିକଟ ଡାଳିମ୍ବପୁର ଗ୍ରାମର ଦୁଇ ଯୁବକ ନକଲି ସ୍ୱାସ୍ଥ୍ୟ ପ୍ରମାଣ ପତ୍ର ଯୋଗାଉଥିବା ନେଇ ପୋଲିସ ଖବର ପାଇଥିଲା ।
ଏହାପରେ ପୋଲିସ ଚଢ଼ାଉ କରି ଦୁଇ ଅଭିଯୁକ୍ତଙ୍କୁ ଗିରଫ କରିଛି । ଦୁଇ ଅଭିଯୁକ୍ତ ଡାଳିମ୍ବପୁର ଗ୍ରାମର ଗୋପୀନାଥ ତରାଇଙ୍କ ପୁଅ ଦୀପକ ତରାଇ ଓ କେଶବ ତରାଇଙ୍କ ପୁଅ କାଳନ୍ଦୀ ତରାଇ ବୋଲି ଜଣା ପଡ଼ିଛି । ନକଲି ସ୍ବାସ୍ଥ୍ୟ ପ୍ରମାଣପତ୍ର ପାଇଁ ଅଠରବାଙ୍କୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ବସନ୍ତ କୁମାର ରାଉତ ଓ ଡାକ୍ତର ପ୍ରସନ୍ନ କୁମାର ସାମଲଙ୍କ ନକଲି ଷ୍ଟାମ୍ପ ପ୍ରସ୍ତୁତ କରିବା ସହ ଜାଲ୍ ଦସ୍ତଖତ କରୁଥିଲେ ଅଭିଯୁକ୍ତ ।
ଏହାକୁ ବ୍ୟବହାର କରି କୋଭିଡ ସମେତ ସ୍ୱାସ୍ଥ୍ୟଗତ ପ୍ରମାଣପତ୍ର ଶ୍ରମିକଙ୍କୁ ଯୋଗାଉଥିବା ନେଇ ଅଭିଯୋଗ ହୋଇଛି । ପୋଲିସ ଦୁଇ ଅଭିଯୁକ୍ତଙ୍କୁ ଗିରଫ କରିବା ସହ ସେମାନଙ୍କ ନିକଟରୁ କମ୍ପ୍ୟୁଟର ଓ ନକଲି ସିଲ୍ ଜବତ କରିଛି । ପୋଲିସ ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିବା ସହ ଏଥିରେ ଆଉ କେଉଁମାନେ ସାମିଲ ରହିଛନ୍ତି ସେନେଇ ତଦନ୍ତ ଜାରି ରଖିଛି ।
ଇଟିଭି ଭାରତ, ପାରାଦୀପ
