ପାରାଦ୍ଵୀପ: କୁଜଙ୍ଗ ଥାନା ଅଧିନ ସନ୍ତରା ଗାଦିବ୍ରହ୍ମ ସ୍କୁଲ ପରିସରରୁ ଜନୈକ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତ ଯୁବକ ଜଣକ ସ୍ଥାନୀୟ ସନ୍ତରା ଗ୍ରାମର ପ୍ରଫୁଲ୍ଲ ସ୍ବାଇଁଙ୍କ ସାନ ପୁଅ ଅତୁଲ୍ ସ୍ବାଇଁ ବୋଲି ଜଣାପଡିଛି । ଘଟଣାକୁ ନେଇ ପରିବାର ପକ୍ଷରୁ କୁଜଙ୍ଗ ଥାନାରେ ହତ୍ୟା ଅଭିଯୋଗ କରାଯାଇ ଥିବାବେଳେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହୋଇନାହିଁ ।
ଅତୁଲ୍ ବିଭିନ୍ନ ବ୍ୟବସାୟଙ୍କ ସହ ଗତ ୬ ମାସ ହେବ ଆର୍ସେଲର ମିତ୍ତଲ-ନିପ୍ପନ ଷ୍ଟିଲ କାରଖାନାରେ କାମ କରୁଥିଲେ । ଗତକାଲି(ମଙ୍ଗଳବାର) ରାତିରେ କାର୍ଯ୍ୟକୁ ଯିବାକୁ କହି ଘରୁ ବାହାରକୁ ଯାଇଥିଲେ । ମାତ୍ର ସ୍କୁଲ ପରିସରରେ ଥିବା ଏକ ପଡିଆ ନିକଟରେ ଆଜି ମୃତଦେହ ପଡ଼ିଥିବା ଦେଖି ଛାତ୍ରଛାତ୍ରୀ ଓ ଶିକ୍ଷୟତ୍ରୀ ଗ୍ରାମବାସୀ ଓ ପୋଲିସକୁ ଖବର ଦେଇଥିଲେ । ଗ୍ରାମବାସୀ ମୃତକଙ୍କୁ ଚିହ୍ନଟ କରିଥିବା ବେଳେ ସ୍କୁଲର ଏକ ଘରେ ମଦ ବୋତଲ, ଅତୁଲଙ୍କ ମୋବାଇଲ ଏବଂ ନିକଟରେ କିଛି ପ୍ଲାଷ୍ଟିକ ଗ୍ଲାସ୍ ପଡ଼ିଥିବା ଦେଖିବାକୁ ପାଇଛନ୍ତି ।
ତେବେ ଟଙ୍କା ପଇସାକୁ ନେଇ କିଛି ବିବାଦ ଥିଲା, ଯାହାକୁ ନେଇ ଅତୁଲ ମାନସିକ ଦୁଶ୍ଚିନ୍ତାରେ ଥିଲେ ବୋଲି ସ୍ଥାନୀୟ ଲୋକେ କହିଛନ୍ତି । ସେପଟେ କେହି ଦୁର୍ବୃତ୍ତ ମୁଣ୍ଡକୁ ଆଘାତ ଦେଇ ହତ୍ୟା କରିଥିବା ପରିବାର ଲୋକେ ଅଭିଯୋଗ କରିଛନ୍ତି । କୁଜଙ୍ଗ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହିତ ସାଇଣ୍ଟିଫିକ୍ ଟିମକୁ ଖବର ଦେଇଛି । ଅତୁଲଙ୍କ ମୁଣ୍ଡ ପଛପଟେ ସାମାନ୍ୟ ଫୁଲିଥିବା ଦେଖିବାକୁ ମିଳିଛି । ବ୍ୟବଚ୍ଛେଦ ରିପୋର୍ଟ ଓ ସାଇଣ୍ଟିଫିକ୍ ଟିମର ତଦନ୍ତ ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ପୋଲିସ କହିଛି ।
ଇଟିଭି ଭାରତ, ଜଗତସିଂହପୁର
